Тываның суурларын хөгжүдеринче 700 сая ажыг рубльди угландырар

2025 чылда «Көдээ девискээрлерниң комплекстиг хөгжүлдези» федералдыг программаның кол ажылдары Тываның алды кожуунунга – Таңды, Улуг-Хем, Бай-Тайга, Тес-Хем, Өвүр база Эрзинге эгелээрин Тываның Баштыңы Владислав Ховалыг бодунуң блогунда ооң дугайында дыңнаткан.

Бо кожууннарның төлевилелдери Россияның, республиканың база муниципалдыг тургузугларның бюджеттеринден, ол ышкаш бюджеттен дашкаар акша-хөреңги киирилдезин барымдаалап, 693 сая ажыг рубльдиң субсидиязын алыр.

– Социал болгаш инженер инфратургузуунуң, чуртталга бажыңнарының, оруктар, культура болгаш спорт объектилериниң тудуу дээн ышкаш кол угланыышкыннар аразынга ону хуваар. Бо үнген чылда Улуг-Хем кожууннуң Шагаан-Арыгда 150 олуттуг уругларның уран чүүл школазын, Чодураа суурда 176 олуттуг школаны чедир тудар. Ол ышкаш Таңдының Бай-Хаак суурда клуб тудуун база доозар. Эгелеп алганы албан чериниң бажыңының тудуун база уламчылаар – деп, Владислав Ховалыг чугаалаан.

2025 чылда Тываның көдээ девискээрлерин хөгжүдеринче социал болгаш инженерлиг инфратургузугну, чуртталга бажыңнарын, оруктар, культура болгаш спорт объектилерин тудары кирген. Орук-тудуг ажылдары-биле Эрзин кожууннуң Булуң-Бажы суурже кирер орукту чаартыр. Ада-чурттуң улуг дайынының киржикчизи Галина Довааторнуң адын эдилээн кол кудумчуну база септеп селиир.

Хөй-ниити шөлдерин чаагайжыдар төлевилелдерже белеткел эгелээн. Кызыл кожууннуң Сукпак, Бай-Тайга кожууннуң Ээр-Хавак суурларында уругларның спортчу болгаш ойнаар шөлдерин чаагайжыдар. «Енисей» Р257 федералдыг автооруктуң төнчү сууру болур Хандагайтыда «Россия – Тыва» тураскаалды долгандыр дыштанылга девискээрин чаагайжыдып кылыр.

«Көдээ девискээрлерниң комплекстиг хөгжүлдези» программаның сорулгазы – суурда амыдыралдың шынарын бедидип, суурже көжүп келиксээн кижилерге сонуурганчыг байдалды тургузарында. Программа чорудуу-биле кол инвестицияларны өске черлерге бодаарга, кол чурттакчылыг черлерниң чаагайжыдылгазынче киирер.

Тывада кожуун төптерин шак ындыг “кол черлер” кылдыр тодараткан. Ычангаш программаның бирги чадазында амгы үениң чаагайжыткан чуртталга бажыңнарын база ону хандырар инфратургузугну тударын көвүдедир.