Тываның төөгүзүн болгаш тоолдарын таныштырган

Тываның гуманитарлыг болгаш тускай шинчилелдер институдунуң төөгү болгаш дыл секторунуң эртем ажылдакчылары Солангы Чыргалан биле Эллада Аннай «Бельбей» лагеринде дыштанып турар уругларга чедип, көргүзүглүг солун ужуражылганы эрттиргенин институт дыңнаткан .

Солангы Чыргалан Тываның төөгүзүн чугаалап, XX чүс чылдың болуушкуннарын архив чуруктарын көргүспүшаан таныштырган. Уруглар кичээнгейлиг дыңнап, айтырыглар салып, киржилгелиг олурганы өөрүнчүг.

Эллада Аннай тыва тоолдар дугайында көргүзүглүг тайылбыр кылып, уругларга тоолдарның аңгы-аңгы хевирлерин таныштырган. Түңнелинде уруглар кандыг тоол кандыг хевирге хамааржырын тодарадып, кезек тыва тоолдарны танып-билип алганнар. Уруглар-биле кады Бора-шээлей деп ырыны ырлажып, омак-хөглүг ужуражылгазын төндүргеннер.

Мындыг хевирлиг ужуражылгалар кайы-даа талага ажыктыг болган, ынчангаш институттуң аныяк эртем ажылдакчылары моон-даа соңгаар мындыг хемчеглерни эрттирер бодалдыг.