Улан-Удэ хоорайга Россияның чоннарының чаңгыс деминиң чылынга тураскааткан кожа-хелбээ бурят чоннуң чыл санында-ла эрттирип турар «Алтан Мундарга» деп делегей чергелиг этнокультурлуг IX дугаар фестивалы болуп эрткенин Тыва үндезин культура төвү дыңнаткан.
Фестивальдың кол улуг оюннарының бирээзи – «Хээр шаалган (сээр хухалха)» хендирбе сый шаварынга мөөрей. Бо кайгамчык хемчегге Бурятиядан, Забайкальеден, Иркутск облазындан, Моолдан, Кыдаттан 900 ажыг спортчу киришкеннер. Оларның аразында Тываның адын төлээлеп ниитизи-биле 14 тыва оол байырлалдың хемчеглеринге соруктуг чараш оюнун көргүзүп, тыва чонунуң алдар-адын киискиткеннер.
Эрзин кожуундан Найсам Дандаа тос чүс ажыг киржикчиниң аразындан шупту чадаларны эрткеш, он тос шыырак хендирбежилерниң байзазынче кирип, хар-назы аайы-биле бодунуң категориязынга II черни чаалап алган.
Хендирбе сый шавар оюндан аңгыда, тевекчилер аразынга база спортчу мөөрей болуп эрткен. Ук оюнга Тываның адын бедик деңнелге тудуп чоруур тевек оюнунуң тергиин ойнакчызы Отчугаш Хомушку 5555 санга чедир тепкеш "Тевектиң күчүтени" деп бедик адын бадыткап, чемпионнаан. Ол 2020 чылда IV дугаар «Алтан Мундарга» фестивалынга тевек оюнунга 853 катап тепкеш көрүкчүлерниң кичээнгейин хаара тудуп, кайгаткан. Ооң чылдан-чылче тевек теверинге мергежили улам сайзырап, чедиишкинниг хөгжүп чорууру чоргааранчыг.
База ол ышкаш Улуг-Хем кожууннуң төлээзи Чодураа Кежик 260 катап тепкеш II черге төлептиг болган.
Улусчу оюннарда чоннуң хей-аъды болгаш күш-шыдалы сиңген дээрзин шак мындыг улуг национал фестивальдар бадыткап турар. Ук фестивальга чаңгыс чер чурттугларывыстың тиилекчилер болуп киргени тыва чоннуң бир улуг чедиишкини деп төп санап турар.
