К.Б. Ондар аттыг Тыва үндезин культура төвүнге “Чиңзе” кызыгаарлаан харыысалгалыг ниитилелдиң чиңгине директору, Россияның Географтыг ниитилелиниң кежигүнү, Тывада баштайгы «Дээди категорияның үдекчизи” деп шынзылганың эдилекчизи Артцалам Хертектиң ажыл-чорудулгазынга тураскааткан чурук делгелгези ажыттынганын төп дыңнаткан.
Байырлыг ажыдыышкынга Артцалам Николаевичиниң чоок кижилери дөргүл-төрели, эш-өөрү, кады ажылдап чоруур иштежилери чылыг-чымчак байыр сөстерин чедиргеннер.
Дээди категорияның үдекчизи төрээн Тывавыстың каас-чараш чурумалдыг черлерин болгаш онзагай булуңнарын чурукка тырттырып, ону чон аразынга мөңгежидип, республика иштинге туризм адырын хөгжүдер талазы-биле хемчеглерни идепкейлиг боттандырып, Тываның туризм адырының сайзыралынга улуг үлүг-хууну киирип чоруур кижилерниң бирээзи.
Россияның Географтыг ниитилелиниң кежигүнүнүң чогаадыкчы ажыл-ижиниң бадыткалы – хууда чурук делгелгезиниң ажыдыышкыны-биле төптүң ажылдакчылары байырны чедирип, ам-даа улуг чедиишкиннерни күзеп, хей-аъды бедик, сүлде-сүзүү, тура-соруу быжыг болурун йөрээген.
Чурук делгелгезинче күзелдиг кижилерни сонуургап көөрүнче төп чалап турар.