Улуг-Хем кожуунга улуг хемчээлдиг команда-штабтыг өөредилге үезинде кожуун чагыргазы болгаш регионалдыг онза байдалдар албанының девискээр иштики системазы чер кырының өрттериниң чурттакчылыг черлерже шилчий берип болурунче кичээнгейни угландырып, онза байдалдарны дүрген чайладырын катаптааннар. Чуртталга бажыңнары болгаш экономика объектилерин ындыг өрттерден камгалаарынче кичээнгей угланган.
Тываның Баштыңы Владислав Ховалыг МАХ-та бодунуң каналынга өөредилгелер дугайында чугаалап, өрт сезонунга белеткенири эрге-чагырга черлериниң кол айтырыгларның бирээзи дээрзин демдеглээн. «Шупту албан черлериниң демниг хөделиишкинеринден база шиитпирлерни дүрген хүлээп алырындан республика чурттакчыларының айыыл чок чоруу хамааржыр» – деп, ол демдеглээн.
Владислав Ховалыгның чугаазы-биле алырга, ол өөредилгелер күштерниң болгаш курлавырларның беленин хынап, дүрген хөделириниң планнарында четпестерни илередип, албан черлер аразында кады ажылдажылганы быжыглаар. Шын онза байдалдар үезинде дүрген болгаш чедимчелиг хөделиринге ол дузалаар деп, тайылбырлаан.
Өөредилге үезинде онза байдалдарны болдурбазының база чайладырының болгаш өртке удур айыыл чок чорук комиссиязының хуралы, өрт айыылының үезинге удур белеткелдиң хыналдазы, Арыг-Бажы суурда чурттакчылыг бажыңга өртке удур демиселдиң практиктиг кичээли болуп эрткен. Киржикчилер хөделириниң чурумун, албан черлер аразында кады ажылдажылганы, өрттен чайладырының болгаш өжүрериниң чурумун катаптааннар.
Улуг-Хем кожууннуң 17 дугаарлыг өрт албан чери болгаш тус черниң эки турачы өртчүлер дружиназы хемчегге идепкейлиг киришкен. Кожуун чагыргазының дыңнатканы-биле алырга, шупту албан черлери демниг ажылдап, бедик мергежилин, дүрген ажылдап үнеринге беленин көргүскен.
Россияның Онза байдалдар яамызының Тывада Кол эргелели эрткен неделядан эгелеп, республиканың чурттакчылыг суурларында арга-арыг болгаш бойдус өрттеринге таваржып болгу дег айыылдыг черлерде өртке удур айыыл чок чоруктуң хыналдазын чорудуп турар.
Муниципалдыг тургузугларда өртке удур ажыл-чорудулга кошкак дээрзин хыналда илереткен. Кожууннар удуртукчуларынга сагындырыгны берип, илереттинген четпестерни дораан чайладыр даалганы берген.
Республикада чарлаан өртке удур онза чурум төнгүжеге эки турачы өртчү дружиналарның белен турарынче база оларның хүн бүрүде дежурныйлаашкынын хандырарынче онза кичээнгейни угландырган.