Бөгүн Мөңгүн-Тайга кожууннуң Кызыл-Хая суурга сарлык хүнүнге тураскааткан байырлыг хемчеглерлер эртер. Эрткен чылын Тываның Баштыңының шаңналы дээш мөөрейге тиилээн "Тывавыстың чоргааралы – сарлык малым" төлевилелди ТР-ниң Библиотекалар ассоциациязы биле Мөңгүн-Тайганың төпчүткен библитека системазы катчып алгаш боттандырып, "Тайга черим чараш малы" деп эртем-практиктиг девискээр конференциязы-биле байырлалды эгелээр.
Конференцияның ажылынга Эрзин, Барын-Хемчик, Бай-Тайга кожууннардан база Кызыл, Ак-Довурак хоорайлардан илеткелчилер киржир. «Сарлыктың тывылган төөгүзү», «Сарлыкты ажаап-өстүрери», «Сарлыктарның чүзүннери», «Сарлык ажыл-агыйының төөгүзү», «Тываның улусчу мастерлериниң ажылдарында сарлык» болгаш өске-даа темаларга илеткелдерни номчуур.
Оон аңгыда шүлүкчүлерниң, композиторларның, профессионал чурукчуларның, хореографтарның, фотографтарның конкурстары, сарлыктарга база сарлыкчыларга тураскааткан школачыларның чогаадыглар мөөрейи база болур.
Сарлыктар чарыжы, өглер хоорайы, сарлык эът, сүдүнден аъш-чем кылыры, уран чогаадылга ажылдарының мөөрейи солун болуру чугаажок. Бо төлевилел мөңгүн-тайгажыларның тускайлаң амыдыралын, Соңгу чүктүң кадыг дошкун байдалында сарлыктарны азырап-өстүрерин, сарлыкчыларның ижин, амыдыралын бүгү талазындан көргүзер.
Тывада Мөңгүн-Тайга, Бай-Тайга, Барыын-Хемчик, Өвүр, Эрзин кожууннарда сарлыктарны азырап, өстүрүп турар. Чаажыктырган сарлык азыралга-даа, мал чеминге-даа шоолуг хереглел чок. Олар чедери берге, бедик черлерже оъттап чоруй баар. Мөңгүн-Тайга кожуунда сарлык бажы эң хөй. Сарлык кожууннуң ылгавыр демдээ болуп, сүлде демдээнде сиилбиттинген.
#Мөңгүн_тайгакожуун #Кызыл_хая #Тывавыстыңчоргааралы_сарлыкмалым #Төлевилел #Библиотекаларассоциациязы #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
Тывавыстың чоргааралы – сарлык малым
9 июня 2022
48