Бүгү Россияда тургустунуп келген эпидемиологтуг байдал-биле ортумак болгаш дээди өөредилге черлери ырактан (дистанциялыг), интернет таварыштыр өөренир байдалче шилчээн.

Коронавирус аарыын болдурбас болгаш нептеретпес сорулга-биле РФ-тиң Эртем яамызының дужаалы езугаар март 18-тен эгелеп Тываның дээди болгаш ортумак өөредилге черлериниң сургуулдары интернет таварыштыр өөренип эгелээн.

Ырактан өөренир дээрге-ле, башкылар биле сургуулдар аразында электроннуг өөредилге-харлызаа-дыр. Ылаңгыя Тываның Күрүне университединде бо система чаа эвес, ону чоокку чылдарда-ла кииргеш, сайзырадып эгелээн. Студент бүрүзүнде (бот өөредилгелиг-даа студентилерде) чогуур логин болгаш пароль бар. Университеттиң башкылары студентилер-биле электроннуг өөредилге курлавырларынче (лекциялар, семинарлар, онаалгалар дээш өске-даа) киргеш, ажылдап болур.

Тываның Күрүне университединде вирустан камгаланыр болгаш ону таратпазының дүрүмнерин сагыыры-биле шупту байдалдарны тургускан.

Амгы үеде университетте өөренип турар кыдат студентилер чуртунче чангаш, улаштыр февраль айдан эгелеп интернет таварыштыр өөренип эгелээннер. Өске даштыкы чурттардан 61 сургуул өөренип турар, оларның 53-ү Моолдан. Ол студентилерни Моолче чандырарын шиитпирлээн. Амгы үеде ийи чурт аразында Тывада өөренип турар моол сургуулдарны үдеп чорударын дугуржуп турар.

ТывКУ-да хүндүскү салбырда 3500, бот-өөредилге-биле 1500 кижи өөренип турар. Студентилерге интернет таварыштыр өөренир эптиг байдалды тургускан. Университеттиң ниити чуртталга бажыңнарында интернетче кирер Wi-Fi-ны кошкан, сургуулдар интернетти хостуг ажыглап турар. Бо хүнде кожууннардан келген уруглар суурларынче чанып турар, ниити чуртталга

бажыңында сургуулдарның 15 хуузу арткан. Амгы үеде даштыкы чурттарда солчулга-биле өөренип турар сургуулдар чок.

ТР-ниң Өөредилге болгаш эртем яамызында школалар болгаш техникумнарга ырактан өөрениринге (дистанциялыг) методиктиг сүмелерни ажылдап кылган. Яамының сайтызында “Дистанционное обучение” деп тускай арынны ажыткан. Ында башкыларга, школачыларга, студентилерге база ада-иелерге сүмелерни болгаш нормативтиг дүрүмнер документилерин киирген.

Алдынай АРАКЧАА.

Реклама

ОСТАВЬТЕ ОТВЕТ

Пожалуйста напишите Ваш комментарий
Пожалуйста введите Ваше имя