Бөгүн Кызыл хоорайның төвүнде тыва эки турачылар тураскаалының чанындан дайынчы хөделиишкиннер девискээринде Донбасстың чурттакчыларынга боттарының изиг күзели-биле дуза чедирер дээн эки турачыларны чон үдээн.
ТР-ниң Дээди Хуралының Даргазы Каң-оол Даваа эки турачыларга бүдүн-бүрүн, кадык-чаагай болгаш тиилелгелиг чанып келирин күзээн.
– Украинаны, Донецк болгаш Луганск республикаларны украин националистерден болгаш хөлезилеттинген даштыкы өлүрүкчүлерден хостаарынга киржир дээн эки турачыларны бөгүн Кызылдан үдедивис.
Российжи шериг кезектеринде бактаап турар оолдарывыс Украинаны неонацистерден хостажып эгелээнден бээр ай ажа бердилер. Сеткилинден чыгган аъш-чемин база гуманитарлыг дуза кылыр чонувус чорудуп туру. Украинаның чонунга дузалаар буянныг ажылывыс сезен чыл эрткенде катап эгелээн-дир деп чугааладым. Тыва чуртуңар төлдери силер деп чүвени утпазын олардан диледим!
1943 чылдың сентябрь айда тыва эки турачыларны дайынче үдеп тура, ТАР-ның Биче Хуралының Президиумунуң Даргазы Анчимаа Хертек мынча дээн: «Ада-чуртуңарны эрес-маадырлыг камгалаарыңарны силерге дагзып тур бис. Тиилелге шагы дүрген келири-биле, дайзыннарны кээргел чокка узуткаңар!». Тываның ынчангы удуртукчузунуң ол сөстери бөгүн база катап күштүг болу бергенин эки турачыларга сагындырдым.
Чайгылыш чок, быжыг туруштуг чуртташтарывыска бүдүн-бүрүн, кадык-чаагай чанып кээрин күзедим. Эки чорааш, тиилелгелиг чанып келиңер, эки турачылар!
