Өвүр кожууннуң Улаатай аржаанынга бо чайын Кызылдан дыштанып кээп чораан Хүреш-оол Хертек бедик даг кырында дүрзүлерни септеп-селээнин чагырга чери дыңнаткан.
Хүреш-оол Опеевич Бай-Тайганың Кара-Хөл чурттуг. "Дыштанып кээрде, Кызылдан бодумнун машинамның кожуунга цемент, дозу, манза дээш херек чүүлдерни чүдүруп алгаш келдим. Элээн каш чылдарда септеттинмээн эликтер дүрзүлерин хевир киирдим. Аржаанга кирип турган кезек оолдарны эвилелдээш, чаа арыгланыр черни база кылдывыс. Чонувустуң шагдан бээр эмненип, домнаныр аржаан сугларлыг черлеривис чараш болгаш чаагайжыдылгалыг болурун күзээр дир мен" – деп, дыштаныкчы чугаалаан.
Кожууннуң чагыргазы Хүреш-оол Хертек ышкаш холу туттунгур, шевер болгаш сагыш човаачал кижилерге четтиргенин илереткен.
Бойдузувустуң эм шынарлыг аржааннарынга хумагалыг болуулунар!