Улуг өгбе чогаалчының 115 харлаан оюнга тураскааткан чурук мөөрейи

Өвүр кожууннуң уругларның үлегер-майыктың ном саңынга улуг өгбе чогаалчывыс – Степан Агбаанович Сарыг-оолдуң 115 харлаан оюнга тураскааткан кожуун чергелиг «Аңгыр-оол – уругларның ынак маадыры» деп чурук мөөрейи болуп эрткенин ном саңы дыңнаткан. Аңаа ниитизи-биле 20 уруг киришкен.

Уруглар чогаалчының ийи томнуг номундан аңгы-аңгы эгелерни номчуп чураан: «Азаларга таварышкан бис», «Бажым кыргытканым», «Хой кадарары», «Чылбыга сывырыпкан», «Шагаа» дээш оон-даа өске.

Жюри дараазында түңнелдерни үндүрген. Бирги болгаш ийиги черлерге Хандагайты школазының 7 «в» клазының өөреникчилери Чайзат Куулар биле Чимит-Доржу Каң-оол төлептиг болганнар. Үшкү черни Дус-Даш школаның сески классчызы Сайын-Кыс Кыргыс база чедиги классчы Айыска Ажы-оол олар үлешкеннер.

«Чаңгыс демниг Россия» партиязының, “Баштайгыларның шимчээшкини” уруглар болгаш аныяктарның бүгү-российжи шимчээшкининиң тус черде салбырлары, Төлээлекчилер хуралы уругларны деткээн.