Тыва үндезин культура төвүнге ук албан чериниң директору Игорь Көшкендей ТР-ниң чогаалчылар эвилелиниң төлээлери-биле чугула ужуражылганы эрттирген. Аңаа "Улуг-Хем агымы" чогаал сеткүүлү-биле кады ажылдажылганы сайзырадыр айтырыгларны чугаалашкан.
Бо болуушкун регионда культурлуг болгаш чогаадыкчы харылзааларны быжыглаар кончуг ужур-уткалыг базым болган.
Ужуражылга үезинде ийи Чогаалчылар эвилели база Россияның Чогаалчылар эвилелиниң Тывада регионалдыг салбыры-биле кады демниг ажылдажылганың дугайында допчузу-биле сайгарып чугаалашкан.
Тус черниң авторларын деткииринче, чогаал ажылын хөгжүдеринче болгаш амгы үениң чогаал делегейинге тыва дылдың болгаш чогаалдың туружун быжыглаарынче онза кичээнгейни угландырган.
Ужуражылганың киржикчилери шупту келир үеде тыва чогаалдың чечектелип сайзыраарынга болгаш ооң сүүзүннүг өнчүзүн кадагалап арттырарынга күженниишкинни үндүрүп, демнежиринге беленин быжыы-биле илереткеннер.
"Улуг-Хем агымы" сеткүүл солун-сеткүүлдерни деткиир бүгү-российжи мөөрейге төлептии-биле тиилээнин аңгы онзалап демдеглээр апаар. Грантының акша-хөреңгизи, 1946 чылда тургустунгаш, бо чылын 80 чыл оюн демдеглеп турар Тыва Республиканың доктаамал үнүп турган улуг назылыг сеткүүлүн катап тургузар арганы бээр.
Оон аңгыда ук акша-хөреңгиниң чамдыызын сеткүүлдүң чаа үндүрүлгелерин белеткээр, үндүрер болгаш тарадыры-биле холбаалыг бөлүк хемчеглерни организастаарынче угландырар. Ол чогаалдың национал езу-чаңчылдарын кадагалап арттырарынга болгаш сайзырадырынга чугула чүүл болур.