Улуг-хем кожууннуң көдээ ажыл-агый эргелелиниң кол зоотехниги Бора-Хөл Эңмекей часкы тарылгага белеткел ажылдарының дугайында таныштырганын чагырга чери дыңнаткан.
Бо чылын көдээ ажыл-агый культураларын 886,9 гектарга тарыыры планнаттынган. Эрткен чылга деңнээрге, тараа тарыыр шөлдер 57 хуу кызырылган. Ооң иштинде тараа культураларын 100 гектарга, мал чеминге ажыглаар тараа культураларын 463 гектарга, картофельди 303 гектарга, ногаа аймаан 20,9 гектарга тарыыр.
Часкы тарылга ажылынга көдээ ажыл-агыйларга тараа культураларын тарыырда 18 тонна үрезин, 83,3 тонна мал чеминге ажыглаар культуралар үрезини, 757,5 тонна картофель үрезини негеттинип турар. Боттарының үрезинин арттырып алган араттардан Ш.Ч. Монгуш 20 тонна кызыл-тас үрезинин, М.С. Данзы-Белек алды тонна картофель үрезинин курлавырлаан.
2026 чылда часкы тарылганы сес арат ажыл-агыйы чорудар. Үрезин садып алырын дугурушкан араттар: Ш.Ч. Монгуш («Оргаадай» көдээ ажыл-агый кооперативи) И.К. Брамман-биле 640 муң рубльге сула үрезинин, М.С. Данзы-Белек «Тагарское» хааглыг акционерлиг ниитилел-биле 391 муң рубльге сула үрезинин садыглажыр кылдыр дугурушкан.
Араттар О.С. Санчы, Ш.В. Оюн, Г.Д. Олчанмай, М.В. Сумба, А.Б. Дадар-оол, хууда дузалал ажыл-агыйлыг А.О. Домбаа база «Тагарское» ниитилел-биле дугуржулганы кылган.
Часкы тарылга ажылдарынга ниитизи-биле 15 тонна кывар-чаар материал хереглеттинип турар. Бо хүнде керосин өртээ 1 литрде 88 рубль. Араттар кывар-чаар материал дугайында хуу сайгарлыкчылар-биле керээни чарып турар.
Торгалыгда суггарылга бугазы 500 гектарны суггарыптар шыдалдыг. Ооң 239-зу тарылга, арткан 261 гектар сиген шөлдери. Торгалыгда араттар М.С. Данзы-Белек, О.С. Санчы, база хууда дузалал ажыл-агыйлыг А.О. Домбаа суггаттыг шөлдерлиг. Сигенниң болгаш тараа дүжүдүнүң элбек болурунуң эң кол дөзү – суггаттан кончуг хамааржыр. Кааң чылда суггатче кичээнгейни салыры чугула.
Часкы тарылга ажылдарын чорударынга хуу болгаш арат ажыл-агыйлыгларда 61 техника бар, ооң белеткели 70 хуу. Араттар 21 трактор болгаш аңгы-аңгы кожугларлыг.