Улуг-Хем кожууннуң көдээ ишчилери аяс хүннерни ажыглап сиген кезилдезинде кидин түлүк ажылдап турарын чагырга чери дыңнаткан.
Кожууннуң көдээ ажыл-агый эргелелиниң хыналдазының түңнелинде, август 21-ниң байдалы-биле суггаттыг черлерде сигенниң бедии 40-60 см, суггат чок черлерде 25-35 см болган.
Бо хүннерде кожуунда ниитизи-биле 5900 тонна сигенни кезип белеткээн, ооң иштинде арат тараачын ажыл-агыйлар 2900 тонна, хууда дузалал ажыл-агыйлар 2000 тонна, көдээ ажыл-агыйлар 1000 тоннаны кезип белеткээн.
Мал чеминиң белеткелинде 25 бригадада 365 кижи хаара туттунган. 25 бригаданың 22-зи трактор-биле сигенни кезип турар, үш бригада хол кадыыры-биле кезип турар. Ында 35 трактор, 10 чүък машиназы, 13 дүрер болгаш 25 бөлер агрегат ажыглаттынып турар. Мал чеминиң белеткели 50 хууга күүсеттинген.
