Улуг-Хем кожууннуң хоочун шыдыраачылары хостуг үезинде ойнаар, аразында маргылдаалар эрттирер, арга-дуржулга солчур өргээлиг апарганын чагырга чери дыңнаткан.
Хоочун шыдыраачы Николай Саттың эгелээшкини-биле "Буура" клувун ажыдар саналды кожууннуң удуртулгазы деткээн. Клуб ДОСААФ салбырының бир өрээлинде ажыттынган.
ТР-ниң өөредилге сайыдының хүлээлгезин күүседип турар Ренат Ооржак клубтуң байырлыг ажыдыышкынынга киржип, шыдыраачыларга байыр чедирген. Ол шыдыраа оюнунга делегей чемпионнарының хөрек чуруктарын тыпсып, чыылганнарга таныштырып көргүскен.
Улуг-Хем кожууннуң, Шагаан-Арыг хоорайның чагырга черлериниң удуртулгазы, Хайыракан суурнуң хоочун шыдыраачылары, Шагаан-Арыгның хоочуннарының мурнундан К.В.Төгүс-оол байырын чедирип, белек-селектерни тывыскан.
Клубтуң байырлыг ажыдыышкынында Шагаан-Арыгның уругларның уран чүүл школазының гитара клазының башкызы Чимис Донгак кайгамчык чараш үнү-биле хөгжүмнүг байырын чедирген.
