Улуг-Хемде чыдыг чашпан узуткаар ажылдар

Улуг-Хем кожууннуң девискээринде үнген конопляны узуткаар ажылдарже кожуун бюджединден 90 муң акшаны тускайлаанын чагырга чери дыңнаткан.

ТР-ниң Көдээ ажыл-агый яамызындан «СпрутЭкстра» деп 380 литр хоранны алган. Ниитизи-биле 190 гектар чыдыг чашпан үнген шөлдерни хораннаар. Хайыракан дааның эдээнде хендир-сиген үнген кезек шөлден эгелеп ажылды чорудуп эгелей берген.

Чүгле хову-шөлдерде үнген чыдыг чашпанын узуткаанын хынаар эвес, чурттакчылыг черлерни база тускай комиссия хыналдазын чорудар. Бир эвес бажыңының девискээринде чашпан үнүп турар, ону тура тыртып узуткаваан болза, бажыңның ээзин торгаар. Ол ышкаш, албан черлериниң девискээрлерин хынаар комиссия база ажылын эгелээн.