Улуг-Хемде спортзал чок, ара туткан школа Арыг-Бажында

Тываның Баштыңы Владислав Ховалыг Кызылдың ол чарыында 8 дугаар школаның чаа спортзалын тудар аргазын тып, хуу инвестор-биле дугуржуп алганының соонда, ооң тудуу эгелей бергениниң дугайында «ТываМедиаБөлүк» информастыг агентилел дыңнаткан.

Ол медээни номчааш, Улуг-Хемниң Арыг-Бажы суурнуң хоочун чурттакчызы Игорь Кыргысович Анай-оол «ТМБ» информагентилелдиң корреспондентизи-биле телефон дамчыштыр чугаалашкаш, Арыг-Бажынга чаа школаны Кызылдың 8 дугаар школазын тудуп турар үеде тутканын сактып чугаалаан.

Арыг-Бажы школазын база-ла спортзал чок кылдыр тутканынга суурнуң чону хомудап артып каанын Игорь Кыргысович сагындырган. Ам бо хүнде Арыг-Бажы суур Улуг-Хемде чаңгыс спортзал чок суур болуп турар. Ынчангаш школачыларга күш-культура кичээлдери, аңгы-аңгы спотчу секциялар эрттирер арга шуут чок.

"Эзирлерниң уязы» төлевилел-биле эрткен кыжын туткан зал колдуу хүреш секциялары эрттиреринге таарышкан. Аңаа волейбол,баскетбол, мини-футбол дээн ышкаш оюннар ойнаттынмас. Ам бо хүнде ында Улуг-Хемниң мөгелери республика Наадымынга белеткенип турар.

Ынчангаш суурнуң чону Тываның Баштыңынга улуг идегеп, Арыг-Бажының ара туткан школазының тудуунга немей спорт залын тударының аргазын Владислав Товарищтайович черле тыптар деп бүзүреп турарын суурнуң хоочун чурттакчызы дыңнаткан.

Чурукту "Улуг-Хем" солунундан алган