Көдээ ажыл-агый яамызы «Тыва Республикага эъткир болгаш сүткүр уксаалыг бода малды өстүрер болгаш көдээ ажыл-агый продукциязын болбаазырадыр» программа-биле конкурсту чарлаптарга, аңаа көдээ ажыл-агый бүдүрүкчүлери хөйү-биле киришкен.
Улуг-Хемден «Оргаадай» көдээ ажыл-агый бүдүрүлгези ол конкурска киришкеш тиилээн, күрүнеден деткимче грантыны алган.
«Социал-экономиктиг хөгжүлде» программа-биле «Оргаадай» көдээ ажыл-агый бүдүрүлгези материал-техниктиг баазазын экижидер сорулга-биле ГАЗ-А23R33 «Газель» NEXТ маркалыг фургон автомашинаны алган. Ооң өртээ 2 млн. 950 муң рубль. Оон ыңай кырлыг-кара, горох болгаш оон-даа өске крупа аймаан арыглаар дериг-херекселди (9 млн. 836 муң рубль өртектиг) база цех тургузар өрээлдиң септелгезин чорудар 2 млн. 214 муң рубльди алган. Алган 15 млн. акшазының 25 хуузун «Оргаадай» көдээ ажыл-агый бүдүрүлгези (Э.Л.Мандан-оол) боду төлээн, арткан акшаны грант кылдыр алган.
"Улуг-Хем" солунундан
