Улуг-Хем кожуунда мал согар цехтиң байырлыг ажыдыышкынынга Тываның Чазак Даргазының агроүлетпүр комплекизиниң ажыл-чорудулгазын удуртуп-хайгаараар оралакчызы Уран-оол Ондар, көдээ ажыл-агый сайыдының оралакчызы Баир Ховалыг киржип, көдээ ажыл-агый бүдүрүлгезиниң ажыл-чорудулгазын сонуургап четкенин яамы дыңнаткан.
Хууда сайгарлыкчы Орлан Монгуш республиканың социал-экономиктиг хөгжүлдезининиң амы-хууда программазының деткимчези-биле бүдүрүлгени ажыдып алган. Орлан Монгуш Улуг-Хем кожуунга эът болгаш эът аймаандан аъш-чемни садып-болбаазырадыр ажылын эгелээн.
Мал согар цехке малды хүлээп алгаш, кышкы үеде чылыг кажаага тудуп, бир эвес малдың деңгели шоолуг эвес болза, хоолулуг мал чеми-биле кезек семиртир азыраар. Малды хол-биле союп-бускаш, ижин-хырындан бээр аштап-арыглаар ажылчын олуттарны тургускан, амдыызында дөрт кижи ажылдап турар.
– Цехтиң ажылын калбартыр сорулга-биле тускай аппарат база садып алдывыс. Аңаа эътти суккаш хайындырарга, ийи-ле минут болгаш болу бээр. Хой ужазын шенеп хайындырарывыска дөрт минут болгаш болу берди. Консерва, какпактаан эът, белен чылдып чиптер эът холумактыг кадыктар кылыр сорулгавыс база бар. Кадыктарны кылырда "Оргаадай" көдээ ажыл-агый кооперативи-биле дугуржуп, оларның крупаларын садыглажып алыр болзувусса, кожуунда бүдүрүлгелер бот-боттарывысты деткижер аргалыг апаар бис. Келин айтырарда хойнуң ужазын хүнзедир хайындырып кээр болгай. Бисте ону дөрт минута хайындырар аппарат бар – деп, цехтиң удуртукчузу чугаалаан.