«Өг-бүле» национал төлевилелдиң «Улуг салгал» федералдыг төлевилели-биле Каа-Хем кожууннуң Дерзиг-Аксы суурда социал объект – назылап-кыраан болгаш шимчеп албас хамаатыларга дазылга бажыңының тудуу уламчылап турар. Эмчи болгаш амыдырал-хандырылга өрээлдерлиг, 180 оруннуг бажың-интернаттың оран-савазын чада аайы-биле тудуп турар. Амгы үеде тудуг 75,2 хуу белен.
Тываның тудуг сайыды Артыш Кыргыс республиканың Күш-ажыл болгаш социал политика яамызындан иштежилери-биле кады тудуг шөлүн хынап, үнүүшкүннү чоруткан. Хыналда үезинде ажылдарның график езугаар чорудуун база шынарын көрген.
«Бастион» тускай тудуг» кызыгаарлаан харыысалгалыг ниитилелдиң тудуг организациязы тудуг-эптелге ажылдарын кылып турар. Керээ езугаар тудуг ажылдарын бүрүнү-биле доозар: оран-савазын тудуп, иштики болгаш даштыкы инженер четкилерин шөйүп, девискээрин чаагайжыдар.
Амгы үеде өртке удур тускай черни, ижер суг шыгжамырларын, суг алыр болгаш арыглаар объектилер тудуу доозулган. Даштыкы инженер четкизи база чылыг оруун кылган, модульдуг котельнаяны эптээн, чылыг хандырылгазын хандырган.
Кол болгаш чуртталга бажыңнарында тудуштурулга болгаш эптеп салыр ажылдар доозулган, лифт кабиналарын тургускан, кырын болгаш даштын чылыглап дуглаар ажылдар чоруп турар. Чуртталга корпустарында иштики ажылдар доозулгалак, инженер системаларын болгаш электри четкизин кожар ажылдар чоруп турар. Девискээр чаагайжыдар болгаш демир-бетон херимнер тургузар ажылдар эгелээн.
Объект тудуунда чээрби алды тускай мергежилдиг болгаш тудуг техниказы хаара туттунган. Херек тудуг болгаш шеверлел материалдарын план езугаар хандырган.
ТР-ниң Тудуг яамызы тудуг ажылдарын доктаамал хыналдада алган. Тудужулар-биле неделя санында ажылчын хуралдарны эрттирип, тургустунган айтырыгларны дүрген шиитпирлээр дээш, хыналдалыг үнүүшкүннерни чорудуп турар. 2024 чылда төлевилел документациязы күрүнениң ийиги эксперт хыналдазын эрткеш, чогумчалыг түңнелди алган. Ол чүүл төлевилел планын эде көөр, ажылдың бедик шынарлыг күүселдезин хандырар арганы берген.
Тываның Чазаа федералдыг эрге-чагырга органнары-биле төлевилелди боттандырарынга болгаш акшаландырыышкын графигин сагыырынга ниити кады ажылдажылганы хандырып турар. «Орук картазынче» кирген өскерилгелер тудуг-эптелге ажылдарын доозарынга база ийиги чадаже шилчииринге – объектини амгы үениң дериг-херекселдери-биле чепсеглээр арганы бээр.
2026 чылда тудуг-эптелге ажылдарын доозары планнаттынган, улуг назылыглар бажыңы техниктиг курлавырлар болгаш дериг-херекселдер-биле чепсеглеттинер ужурлуг. План езугаар бажың-интернат бо чылын ажыглалче кирер.
