Чаа-Хөлдүң эки турачылары аттыг стадионга Булуң-Терек сумузундан тускай шериг операциязының киржикчизи, улуг сержант Буян Монгуштуң чырык адынга тураскааткан республика чергелиг чадаг чарыш маргылдаазы болуп эрткенин чагырга чери дыңнаткан.
Кожуун чагыргазының даргазы Аркадий Одегей чарышка ырак-чооктан киржип келген спортчуларга чедиишкиннерни күзээн. Бежен алды спортчу аңгы-аңгы хемчээлдерге чарышкан.
18-35 харлыг эр улус аразынга (15 километр) Чөөн-Хемчиктен Наадымның дөрт дакпыр чемпиону Уран-оол Монгуш, 36-45 харлыг эр улус аразынга (10 километр) Тес-Хемден Чойган Тогаачы, 46-55 харлыг эр улус аразынга (5 километр) Чөөн-Хемчиктен Мерген Монгуш олар бирги черлерге төлептиг болган.
18-35 харлыг херээжен улус аразынга (10 километр) Каа-Хемден Айгуль Кувезин, 35-46 харлыг херээжен улус аразынга (5 километр) Улуг-Хемден Айнура Шалган, 46-55 харлыг херээжен улус аразынга (3 километр) Кызылдан Арияна Ооржак олар бирги черлерни чаалап алган.
Чадаг чарыш маргылдаазын маадырның чоок улузу бедик деңнелге эрттирген. Олар келген чонну изиг аъш-чем- биле хүндүлеп, бирден дөртке чедир шаңналдыг черже кирген спортчуларны шаңнап-мактаан. Тускай шаңналдарга төлептиг болганнарны база демдеглээн.
Маргылдааның кол шииткекчилери болгаш кожууннуң спорт школазының тренер башкылары дузазын көргускен.
Кожууннуң удуртулгазы Б.В. Монгуштуң чоок кижилеринге дайынчы маадырның чырык адын мөңгежидип, сактыышкын езулалын эрттиргенинге четтиргенин илереткен.