Улусчу фронт биле Голевтиң даг-руда компаниязы уругларга Чаа чыл белээн дамчыткан

Ниити-российжи улусчу фронтунуң Тывада салбыры Кызылда 55-ки тускай мото-адыгжы (даг) бригадазының дайынчыларының уругларынга Чаа чылдың белектерин дамчыткан.

Шериг албан-хүлээлгелиглер 300 ажыг чигир-чимистиг белектерни уругларга шериг кезээнге эртер байырлалга тыпсыр.
Улусчу фронтунуң регионалдыг салбырының күүсекчи комитединиң удуртукчузу Саима Далчин «Чаа чылды бажың бүрүзүнче» деп акция уламчылап турарын дыңнаткан.

– Бөгүн 55-ки тускай мото-адыгжы (даг) бригадазының дайынчыларының уругларынга чигирзиг белектерни тывыстывыс. Деткикчилеривистиң ачызында республиканың каттышкан штавында Чаа чылдың белектери чыгдынган. Бо белектерни Голевтиң даг-руда компаниязы дамчыткан – деп, Саима Далчин чугаалаан.

Улусчу фронтунуң төлээлери Григорьевтерниң өг-бүлезинге четкен. Офицер Евгений Григорьев тускай шериг операциязының баштайгы хүннеринден эгелээш ында киржип турар. Амгы үеде база дайынчы хөделиишкиннер девискээринде. Ол Жуковтуң медалының эдилекчизи.

Өгнүң кыс ээзи Анастасия база 55-ки тускай мото-адыгжы (даг) бригадазында ажылдап турар. Григорьевтер үш ажы-төлдүг. Хеймер кызы Варвара чеди харлыг. Чаа чылдың белээн ол улуг өөрүшкү-биле хүлээп алган. Улуг оглу ачазының изин салгап, Омскиниң танк-инженер институдунда өөренип турарын авазы чугаалаан.

Улаштыр алды ажы-төлдүг Монгуштарның өг-бүлезинге четкен. Сержант Вячеслав Монгуш база тускай дайынчы хөделиишкиннерниң баштайгы киржикчилериниң бирээзи. Ай-Суу Монгуш уругларының ачазы езулуг-ла өг-бүлежи, ажыл-ишке кызымак, уруг-дарыының кижизидилгезинче улуг кичээнгейни салып чоруур үлегерлиг ада деп онзалап демдеглээн. Ажы-төлүнүң улуу 17 харлыг, хеймери дөрт харлыг.

Кызылда 55-ки тускай мото-адыгжы (даг) бригадазының төлээлери, Анастасия Григорьева база Ай-Суу Монгуш тускай шериг операциязында киржип турар дайынчыларның өг-бүлелеринче сагыш салып турары дээш Ниити-российжи улусчу фронтунуң Тывада салбырынга четтиргенин илереткеннер.

Голевтиң даг-руда компаниязы Ниити-российжи улусчу фронтунуң Тывада салбыры-биле чаңгыс эвес чыл дургузунда кады ажылдап турарын демдеглээри чугула.

Чаа чылда кандыг-даа кижи хуулгаазын, тоолчургу, кайгамчык чүүлдерге бүзүреп, күзелдери боттаны бээринге идегээр. Ылаңгыя чаштар Чаа чылды четтикпейн манаарының ужуру ында.