«Улусчу көвүрүг» база «Тываның сүдү» төлевилелдери немешкен

Тываның Баштыңы Владислав Ховалыг Тыва Республиканың Чазааның 2021 чылда ажыл-чорудулгазының үре-түңнелдериниң база 2022 чылда мурнады боттандырар угланыышкыннарның дугайында отчетудунуң талазы-биле ТР-ниң Дээди Хуралының сессия хуралында илеткелинде бо чылын ийи чаа төлевилелди боттандырарын чарлаан.

Мооң мурнунда-ла эгелээн он дөрт губернатор төлевилелдериниң күүселдези 2022 чылда уламчылаар, оларга ийи чаа – хем-суг көдүрлү бээр үелерде малчын коданнарже аргыжылга айтырыын шиитпирлээр ужурлуг «Улусчу көвүрүг» база «Тываның сүдү» төлевилелдер немежир.