Уран чүүлдүң делегейин каастап чоруур ус-шевер

Улусчу чогаадылга болгаш дыштанылга төвүнге Шагааның ак айында онзагай салым-чаяанныг кижилерниң бирээзи, тыва чаңчылчаан культураның эдилекчизи, камгалакчызы, ус-шевер уран чүүлдүң делегейин каастап чоруур чазаныкчы, мерген адыгжы, хөй-ниитижи, Тыва үндезин культура төвүнүң ажылдакчызы – Артыш Монгуштуң ажыл-чорудулгазынга тураскааткан «Тывам аялгазы» деп концерт бедик деңнелге болуп эрткенин төп дыңнаткан.

Артыш Монгуш 15 чыл дургузунда 300 ажыг хөгжүм херекселдерин чазап кылган. Ооң чазаан хөгжүм херекселдеринде бүдүн Тываның хөгжүмчүлериниң хөй кезии ойнап, чараш хөгжүмүн сагыш-сеткилин таварыштар илередип, чонунга бараалгап чоруурлар. Олар дээрге Тываның национал оркестри, Хөгжүм болгаш сам театры «Саяннар», бөлүктер: «Тыва», «Чиргилчин», «Алаш», «Хартыга», «Khoomei Beat», «Одучу», «Уваң-шу», «Эзеңги» болгаш делегейниң өске-даа булуңнарында тыва хөгжүмнүң мөгейикчилери: Европа, Монголия, Казахстан, Китай, Япония, США дээш о.ө. Артыш Монгуштуң ажылдары Кызылдың А.Б. Чыргал-оол аттыг уран чүүл колледжизинде, Алдан-Маадыр аттыг национал музейниң шыгжамырларында база Аризонаның музейи болгаш «Хуулгаазын шөлдүң» белектер музейинде делгеттинген.

Тыва чоннуң уран чүүлүн чонунга тарадып, сагыш-сеткилинден бердинип, республикавыстың культура адырында быжыг турушту ээлеп чоруур Артыш Монгуш ус-шеверниң чогаадыкчы кежээзинге ооң чоок кижилери, чаңгыс чер-чурттуглары, эгин кожа ажылдап чоруур эш-өөрү чыглып, кайгамчык солун оюн-көргүзүгнү мага хандыр көрүп алганнар.