Уруг бүрүзүнге чаңгыс удааның акша дузаламчызы

Шериг албанынче кыйгырткан курлавырда шериг хамаатыларның өг-бүлелерин деткиири-биле хүлээп алдынган хемчеглерниң бирээзи – өг-бүледе 17 хар чедир назылыг уруг бүрүзүнге беш муң рубльди төлеп бээри.

ТР-ниң Күш-ажыл болгаш социал политика яамызының дыңнадып турары-биле алырга, чаңгыс удааның акша дузаламчызы алыры-биле 227 билдириишкинни киирген. Шак бо сорулгаже республика бюджединден беш сая рубльди аңгылаан.

Ук төлевирни алырда, уругларның авазы билдириишкинни бижээш, чогуур документилерни дужаар. Билдириишкиннерни социал албан черлери чыггаш, төлевирни шилчидери-биле республиканың Күш-ажыл болгаш социал политика яамызынче чорудар. Эң-не кол дужаар документ – ук хамаатыны мөөңнээшкинче кыйгыртканын бадыткаан шынзылга дээрзин сагындыраалы.