Кызыл хоорайда уругларның чайгы дыштанылгазын организастаар кампания уламчылап турарын республиканың немелде өөредилге сайзырадыр төвү дыңнаткан.
Хоорайның 5 дугаар гимназиязында «Өңгүр чай» школа чанының күш-ажылчы лагери ажылдап турарын сагындыраал. Ооң онзагай талазы – хоорайның чаагайжыдылгазынче уругларны хаара туткан, а эң-не кол чүүл – уруглар кылган ажылы дээш шалыңны алыр.
Ук лагерьни ажыдарда, үш таланың керээзин чарган: «Хоорайның парк ажыл-ижи», 5 дугаар гимназия база Кызыл хоорайның чонну ажылга тургузар төвү. Уругларның хар-назыны 14-тен 18 харга чедир болур: ооң чылдагааны – уруглар шалыңны ап турары. Ажылдаар графиги – 5 хонукта 4 шак дургузунда эртенги база дүштеки чеми-биле.
Хоорайның чаагайжыдылгазынга үлүг-хуузун киирбишаан, акша ажылдап алыр күзелдиг элээдилер хөй болган. Ынчалза-даа документилерин мурнай дужааган уруглар кирген. Амгы үеде лагерьде 25 школачы бар, июнь айда, бирги ээлчегде, база ол хире уругну хаара туткан.
Бо үе дургузунда уруглар хоорайның тураскаалдарының чанынга, Телетөп, Калинин кудумчуларында дескинип чоруур оруктарның белдирлеринде чечектерни тараан.
«Хоорайның парк ажы-ижи» албан чериниң дыңнатканы-биле алырга, бо үе дургузунда 180 муң чечекти Кызылда олурткан. Ында «Өңгүр чай» күш-ажыл лагеринден уругларның киирген үлүг-хуузу эвээш эвес.
Лагерьде уруглар чүгле ажылдап эвес, а аңгы-аңгы оюннарны ойнап, солун кижилер-биле ужуражып, чайгы үеде айыыл чок чоруктуң дугайында билип ап турарлар.
