Уруглар ойнаар шөлчүгеш бетондан кылдынганы таарымча чок

Ниити-российжи улусчу фронтунуң Тывада салбырының кежигүннери Кызылдың Крылов кудумчузунда 1а болгаш Московская кудумчузунда 121 дугаарлыг бажыңнарның чурттакчылары девискээринде тургускан уруглар ойнаар шөлчүгештер ажы-төлге айыылды тургузуп турарының дугайында киирген хомудалдарны хынап көөрү-биле аңаа четкен.

Крылов кудумчузунда бажыңның чурттакчызы Сай-Суу Ховалыг уруглар ойнаар шөлчүгешти кылганынга дыка өөрүп турарын дыңнаткан. Ынчалза-даа ук ажылдарны эчизинге чедир кылбаанынга ол хомудаан.

– Шөлчүгештиң шывыы бетондан кылдынганы таарымча чок, ажы-төлүвүс кемдээшкиннерни чаңгыс эвес удаа ап турар. Чайгы дыштанылга үезинде олар ойнаксаар болгай. Тургускан чайганыыштар шимчеп база турган, эр кожаларывыс бетон шывыгже ээриилдерни киир ээрип, быжыглаан. Уругларның айыыл чок чоруун хандырары-биле шөлчүгештиң шывыын чымчак материалдар-биле кылган турар ужурлуг деп интернеттен база номчудум.

Ниити-российжи улусчу фронтунуң регионда салбырынче социал четки таварыштыр ук нарын айтырыгга хамаарыштыр дилег-чагааны бижээн мен. Ооң удуртукчузу Саима Далчин дораан мээң-биле харылзажып, хыналданы чорударын дыңнаткан – деп, ол чугаалап турар.

Ук шөлчүгешти ийи чадага кылган турган. “Туваинвест” КХН-ниң төлээзиниң чугаазы-биле алырга, олар керээ езугаар ойнаар шөлчүгешти дескилендир үстүргеш, бетон шывыгны чаткаш, херимнерни тургускан. Ук ажылдарның түңү – ийи сая рубль. Аңаа уругларга ойнаар дерилгени өске керээ-биле декабрь айда тургускан. Ол ышкаш төлевилелде чымчак азы кылымал шывыг чадар ажылдарны киирбээни база илереттинген. “Уют” башкарыкчы компания чедир кылдынмаан шөлчүгешти хүлээп албайн турар.

Улусчу фронтунуң регионалдыг ажылчын бөлүүнүң удуртукчузу Александр Буланкин уруглар шөлү бир дугаарында айыыл чок болурун онзалап айтып, төлевилелди эгезинден тура шупту негелдерни сагып тургаш кылыр турганын чугаалаан.

Ук шөлчүгештиң девискээри улуг, а ойнаар дерилге эвээш болгаш 10 харга чедир уругларга көрдүнген. Ынчангаш чурттакчылар ону назы-хар аайы-биле аңгылап, аңаа немей теннис столдарын, чайганыыш, чуңгулар тургузарын дилээн.

Кызылдың мэриязының төлээзи Айберген Казырык чедер-четпестерни дарый чайладырын аазаан. Ол чымчак шывыг чадарынга ниитизи-биле бир сая сес чүс рубль негеттинерин дыңнаткан.

Московская кудумчузунда 121 дугаарлыг бажыңының девискээринге шөлчүгештиң төлевилелинче камгалал херимнер тургузарын болгаш чымчак шывыг чадарын киирбээн.

Красноярск крайдан “Стройбизнесресурс” КХН-ниң тудуг участогунуң начальниги Иван Колупаевтиң чугаазы-биле алырга, керээ езугаар уруглар ойнаар шөлчүгежиниң девискээринге элезин төгерин айыткан. Ол ышкаш улус кылаштаар чиңге оруктар, бежик хаажыларны база тургузар. Ук ажылдарны сентябрь 1-ге чедир доозар ужурлуг. Ынчалза-даа хуусаадан эрте доозарын Иван Колупаев бүрүреткен.

Уруглар ойнаар шөлчүгештиң девискээрин хөй каът бажыңнарның чурттакчылары автомашина тургузар чер кылдыр база ажыглап турар. Кежээ хостуг чер тывылбайн баар. “Ук шөлчүгештиң ажылдары доосту бээрге, олар аңаа автомашина тургузарын уламчылаар бе?” деп айтырыг ала чайгаар-ла тургустунуп келир.