«Чаңгыс дыл – чаңгыс кижизидикчи» деп принциптиң планы езугаар Тес-Хем кожууннуң Самагалдай суурунуң «Челээш» аттыг уруглар садынга болгаш Эрзин кожууннуң Мөрен суурунуң «Хүнчүгеш» уруглар садынга практиктиг семинар болуп эрткенин Национал школа хөгжүдер институт дыңнаткан.
Хемчегге 21 башкы ук принциптиң теоретиктиг болгаш практиктиг кезээ-биле ажылдаар методиктиг дузаны алганнар. Семинарга Национал школа хөгжүдер институттуң улуг методизи Альбина Монгуш «Чаңгыс дыл – чаңгыс кижизидикчи: теориядан хүн бүрүнүң практиказынче. Уруглар садының командазынга практиктиг шиитпирлер» деп лекцияны номчаан.
Кызыл хоорайның «Салгал» уруглар садының психолог башкызы Эллада Иргит ийи дылды деңге өөренип турар байдалда уруглар болгаш ада-иелер-биле ажылды чорударының аргаларын сүмелээн. Мындыг хевирлиг практиктиг семинарлар республиканың эксперименталдыг шөлчүгештеринге ам-даа уламчылаар.