«Чаңгыс дыл – чаңгыс кижизидикчи башкы: теориядан хүн бүрүнүң практиказынче. Уруглар садының командазынга практиктиг шиитпирлер» деп семинар Шагаан-Арыг хоорайының «Ручеёк» уруглар садынга болуп эрткенин Национал школа хөгжүдер институт дыңнаткан.
«Чаңгыс дыл – чаңгыс кижизидикчи башкы» деп принциптиң боттандырыышкынының теоризындан практиказынга чедир база ада-иелер-биле демниг ажылдажылганың хевирлери-биле 25 башкы танышкан.
Национал школа хөгжүдер институттуң улуг методизи Альбина Монгуш база Кызыл хоорайның «Салгал» уруглар садының психолог башкызы Эллада Иргит солун лекцияларны номчаан.
Семинарның ажыдыышкынында ук уруглар садының башкылары болгаш кижизиттирикчилери орус болгаш тыва дылдарга шүлүктер болгаш ырыларны бараалгатканнар.
