Уруглар төрээн чуртунуң төөгүзү-биле таныжар

Тываның Өөредилге яамызы өөреникчилерге турисчи оруктарны ажылдап кылган. Республиканың немелде өөредилгени сайзырадыр төп дыштаныр хүннүң тос походу дээш, уругларның 24 турисчи оруктарын ажылдап кылган.

Программада төөгүлүг, чурт-шинчилел, экологтуг, шинчилелдиг турисчи маршруттардан оолдар, уруглар төрээн чериниң төөгүзүн, онзагай черлери-биле чоок таныжар аргалыг.

Тывада төөгүлүг болгаш чараш черлер хөй, ынчангаш республиканың турисчи курлавырын ажыдары-биле уруглар туризмин хөгжүдер деп, ТР-ниң Өөредилге яамызы санап турар.

Төптүң орук айтыкчызын ажыглавышаан өөреникчилер чайгы дыштанылгазының үезинде чаа, солун, турисчи маршруттап, төрээн чериниң төөгүзүн билип алырындан аңгыда, бодунга чаа онзагай черлерни ажыдар.

Тываның Өөредилге сайыды Алексей Храмцов туризмче шымны бергеш, төрээн республиказынга аян-чоруктап, ажы-төлү-биле кады үени ажыктыг эрттирерин ада-иелерге сүмелээн.

– Бис кайгамчык бойдустуг, кончуг чараш черлерлиг болгаш бай төөгүлүг регионда чурттап турар бис. Ол бүгүнү бис үнелеп, кадагалап база шиңгээдир ужурлуг бис. Бистиң өзүп орар салгалывыс төрээн чуртунуң каас-чаражын көрүп, ооң дугайында чаа чүүлдерни билип база Тываның баштайгы бойдузун кадагалап камгалаарын билир ужурлуг. Ада-иелерге уруглары-биле туризмни сонуургап, дыштанырын сүмелеп тур бис – деп, өөредилге сайыды демдеглээн.

Киржикчилерниң күш-шыдалын көрүп тургаш маршруттарны тургузуп, үезин тодаратканын төптүң методизи Чыжыргана Калдар-оол тайылбырлаан. Чижээ, чаа эгелеп чоруур аян-чорукчуларга дыштаныр хүннүң таарымчалыг турларын сүмелээн. Аңаа Каа-Хем кожуунда “Кызыл хаяларже”, Таңды кожуунда Дүрген шуралгаанче походтар хамааржыр.

Көдээ суурларның школачыларынга Кызылдың тураскаалдыг черлеринче, а хоорай оолдар, уругларынга – малчын аалдарже экскурсиялар солун болуру чугаажок. Бай-Тайга кожуунда Цаган-Шибэту шыпшыынче үнер маршрутка тускай спортчу белеткел херек.

Школачыларга турисчи оруктарны ажыглаар күзелдиг кижилер республиканың немелде өөредилге сайзыралының төвүнде туризм, чурт-шинчилел база экология килдизиниң +7(39422)2-46-87 дугаарлыг телефонунче долгап болур. Төптүң специалистери тайылбырны берип, үдекчи азы экскурсия эрттирикчизиниң ачы-дузазы-биле дузалажып болур.