Уруглар төрээн дылыныӊ эгээртинмес байлаа-биле танышкан

Тываныӊ күрүне университединде «Арбай-Хоор» деп чайгы школа июнь 1-ниӊ хүнүнден июнь 17-ге дээр чымыштыг ажылын чорутканын дээди өөредилге чери дыңнаткан.

Чайгы школага Кызыл хоорайныӊ 1, 5, 7, 9, 12 дугаар болгаш Ак-Довурак хоорайныӊ 4 дугаар школаларындан болгаш 25 дугаар уруглар садындан уруглар өөренгеннер. Ниитизи-биле 15 уруг төрээн дылыныӊ эгээртинмес байлаа-биле танышканнар.

Уруглар кыска үениӊ дургузунда тыва чоннуӊ аас чогаалындан – тоолдар, үлегер домактар, тывызыктар, узун тыныш-биле таныжар аргалыг болган. Бичии уруглар чогаалчылары Леонид Чадамбаныӊ, Олег Сувакпиттиӊ, Чооду Кара-Күскениӊ болгаш Шоома Даржайныӊ шүлүктерин номчуп, доктаадып алганнар.

Июнь 17-ниӊ хүнүнде школаныӊ түӊнел байырлалынга өөреникчилерниӊ ада-иелери болгаш кырган-авалары улуг сонуургал-биле киришкен.

Байырлалдыӊ ажыдыышкынын Тываныӊ Улустуӊ чогаалчызы А.А. Даржай аттыг Кызылдыӊ педагогика институдунуӊ директору, доцент Валериана Ликтан ажыдып, ада-иениӊ уругларныӊ төрээн дылын кадагалап арттырарынга улуг сонуургалын демдеглээн.

Эртемден, башкы Любовь Кара-оол уругларныӊ төрээн чугаазын шиӊгээдип алырынга кандыг чаа аргалар бар дээрзин айыткаш, ада-иениӊ дузазы улуг деп демдеглээн.

Уруглар ада-иезинге үлегер домактарны чугаалап, «Шайывыс» деп ырыны ырлап, «Дамдылар» деп чараш самны бараалгаткан. Чыглып келген ада-иениӊ карактарында чоргааралдыӊ оду хып, уруглары-биле катай хөйнүң самын самнаан.

Чайгы школаныӊ ажылын удуртукчу башкылары Шеңне Азыраа, Ия Монгуш түӊнеп тургаш, «Эӊ чүгүрүк аъттыӊ эдилекчизи» деп кажыктар-биле аът чарыжыныӊ, «Узун тыныштыӊ тергиини» болгаш «Аас чогаалыныӊ тергиини» деп мөөрейлерниӊ тергиннерин илередип, шаӊнаан.
Өөреникчилер келир чылын чайгы школага база катап өөренип кээр изиг күзелин илереткеннер.

Ужурашкыже байырлыг, чайгы школа Арбай-Хоор!