Тываның Х Камбы-Ламазы Гелонг Лоден Шераб Башкы Кызылдың 21 дугаар уруглар садынга аалдап четкен.
Школа назыны четпээн уругларның өөредилге чериниң удуртулгазы хүндүлүг аалчыга экскурсияны эрттирген. Ол тыва дыл, логопед башкыларының кичээлдеринге киржип, хөгжүм залын, эштир база бустаныр болгаш оон-даа өске черлерни сонуургап көрген.
Национал хептерлиг чаштар аалчыларга тыва езу-чаңчылдар дугайында, төрээн дылынга шээжилеп алган шүлүктерин чугаалап, сагыш-сеткил мандалазын өңнээннер.
«Тываның Камбы-Лама эргелелиниң, Тубтен Шедруб Линг хүрээзиниң база Кызылдың мэриязының өөредилге талазы-биле департаментизиниң аразында чардынган керээ езугаар уругларның сүлде-сүзүк болгаш мөзү-шынар кижизидилгезинче угландырган төлевилелди боттандырып турар. Уруглар садында бо угланыышкын-биле улуг ажыл кылдынып турарын көрдүвүс. Чаштар төрээн дылын, тыва езу-чаңчылдарны улуг сонуургал-биле өөренип турарын магададывыс» – деп, Тываның Х Камбы-Ламазы Гелонг Лоден Шераб Башкы чугаалаан.
Кижизидикчи башкы Алдынай Монгуштуң дыңнатканы-биле алырга, тыва дыл өөренип турар бөлүкте 38 кижизиттирикчи бар. Олар тыва езу-чаңчылдар, сарыг шажын культуразы-биле таныштырылга таварыштыр уругларга кичээлдерни эрттирип турар.
«Бис Россияның буддийжи регионнарының бирээзи – Тывада чурттап турар бис. Өөредилге чери «Чүрек бүрүзүнде ачы-буян» деп улуг ужур-уткалыг төлевилелди амыдыралда боттандырып, уругларның сүлде-сүзүк болгаш мөзү-шынар кижизидилгезинче улуг кичээнгейни салып турар» – деп, уруглар садының директору Татьяна Аракчаа төлевилел дугайында таныштырган.
«Уруглар садтарында хүреш» төлевилелин өөредилге чери чедиишкинниг боттандырып турар. 5-6 харлыг оолдарны күш-культура талазы-биле инструктор Ачыды Чыргал белеткеп турар. Олар ачыр-дачыр тутчуп, хүрешкен.
Бичии мөгелер школа назыны четпээн хүреш маргылдааларынга шаңналдыг черлерни ээлеп турар.