Тес-Хем кожууннуң Берт-Даг суурунуң школазында 40 чылдың дургузунда тыва дыл болгаш чогаал башкылап чоруур Айлаң Доржунуң өг-бүлези уруглар кижизидилгезинде чаагай чаңчылдарны кол болдурганын республиканың немелде өөредилге сайзырадыр төвү дыңнаткан.
Артемий Иргитович биле Айлаң Дажыевна үш ажы-төлүн, тос уйнуун тыва чоннуң чаагай чаңчылдарынга даянып кижизидип чоруур. Мал-маган азырап чоруур болгаш, олар уйнуктарын чажындан тура малын ажаап-карактаар, эмнеп-домнаар, аът мунар, хой кыргыыр, сиген кезер, кажаа коптарар, көржең чыыр, ыяштаар дээн чижектиг малчын чоннуң чымыштыг ажыл-ижинге өөредип турарлар.
Ажылдан хостуг үезинде оларның уйнуктары тыва оюннарны, ылаңгыя шыдырааны, ойнаарынга ынак. Ынчалдыр улуглары бичии дуңмаларынга ажылды бир дем-биле шалыпкын кылырын-даа, тыва улустуң оюннарын-даа өөредип, дамчыдып берип турар. Өөредилге үезинде алышкылар спортчу оюннарның аңгы-аңгы хевирлериниң тергииннери болуп, шаңнадып-мактадып-даа турар.
Тургузукчу күш-ажыл болгаш өг-бүле ыдыктарының чылында уйнуктар кырган ада-иезиниң аалында күш-ажылга ынак, мөзү-бүдүштүг болуп, тыва улустуң езу-чаңчылдарын херек кырында сагып, күүседип турар кылдыр өзүп турар.