Республиканың уруглар эмнелгезиниң «Уругнуң кадыкшылынче орук» төлевилелиниң эмчилер бригадазы 2025 чылдың тос айында Тываның 17 кожууннарынче, ол ышкаш ыраккы Мөңгүн-Тайга, Тожу, Тере-Хөл кожууннарынче үнген.
Эмчилер планны 80,24 хуу күүседип, 9500 ажыг уругну шинчээн. Бичии уругларны шинчээн соонда, 3097-у аарыг дээрзин илереткен, оларның 620-зи бир дугаар тодараттынган. 602 уруг чурттап турар черинге эмнээшкинни алган, а 547 назы четпээн уругну улаштыр шинчидер кылдыр чоруткан. Төлевилел көдээ черде чурттап турар уругларга чедингир болгаш үезинде шынарлыг эмчи дузазын чедирер, аарыгларны болдурбас, бичии уругларның өлүп-хораар чоруун эвээжедир сорулгалыг ажылдап турар.
Төлевилелде невролог, уруглар стоматологу, ортопед, уролог-андролог, уруглар хирургу, отоларинголог, офтальмолог, акушер-гинеколог, эндокринолог, уруглар кардиологу, психиатр, УЗИ эмчизи дээн ышкаш, ховар тускай мергежилдиглер киржип турар. Олар 2025 чылдың тос айында кадыкшылы кызыгаарлыг 171 уругну шинчип, 93 аарыгны тодараткан. 35 “онзагай” уругну немелде шинчилелдерже чоруткан.
Бо чылга чедир «Кадыкшыл оруу» төлевилел үнүүшкүнү-биле республиканың кожууннарында уругларның профилактиктиг шинчиишкинин чорудуп турганын сагындыраал. Тываның Баштыңы Владислав Ховалыг чыл эгезинде берген бодунуң айыткалында «Кадыкшыл оруу» төлевилелди «Кадык амыдыралче орук» деп чаа хевирге катап ажылдап эгелээрин чарлаан. Уругларның эмчи шинчилгезинге «Уругнуң кадыкшылынче орук» деп аңгы маршрутту тускайлаан.
Төлевилел өскүс болгаш ада-иезиниң хайгааралы чок арткан уругларның кадыкшылынче кичээнгейни база углаан. Үнүүшкүннүг эмчи бригадазы чыл эгезинден бээр ол бөлүкте 923 уругну шинчилээн. 247 аарыгны тодараткан, оларның 62-зи бир дугаар илереттинген. 58 уругну немей шинчидер кылдыр чоруткан, а 10 уругну стационарлыг эмнээшкинче алган.
Төлевилелдиң эмчилери кандыг-бир чылдагаан-биле профилактика субъектилериниң даңзызында турар база амыдыралдың берге байдалынга таварышкан деп санадыр назы четпээннерниң эмчи хыналдазын хандырып турар. Олар тос ай иштинде чединмес өг-бүлелерден 832 уругну шинчээн, 150 назы четпээннерден янзы-бүрү аарыгларны тодараткан. 28 уругну тускай мергежилдиглерниң хыналдазынче чоруткан, 10 кижи стационарлыг эмнээшкинни алган.
Бо чылын уругларның карак аарыглары, ооң соонда – диш аарыглары, үшкү черде – кулак, боостаа, думчук аарыглары нептереңгей болганы илереттинген.
Төлевилелдиң үнүүшкүннүг бригадазы чыл төнчүзүнге чедир ажылын уламчылаар. Эмчилер болгаш специалистер бөлүү Өвүр, Каа-Хем, Чаа-Хөл, Бии-Хем, Эрзин болгаш Сүт-Хөл кожууннарга чоокку үеде чедер планныг.
Эмчилер бригадазы кожууннуң төп эмнелгелеринге хүлээп алыышкынны чорудар. Кожууннуң эмнелге черлери келген специалистерниң ажылдаар черлерин организастап, эмчи бригадазы келген дугайында тус черниң чурттакчыларынга дыңнадыр ужурлуг.
