Тываның культура болгаш туризм сайыды Виктор Чигжит Барыын-Хемчик кожууннуң ховар салым-чаянныг ус-шевери Олег Хомушку-биле ужурашкан.
Тыва үндезин культура төвүнге эрткен ужуражылга үезинде республикада хомус кылып турар ус-шевер Олег Хомушкуну деткиириниң аргаларын сүмележип, шиитпирлээр айтырыгларны чугаалашкан. Ус-шевер Барыын-Хемчик кожуунда чурттап, ажылдап чоруур. Ооң холундан шеверлеп кылган хомустар, билзектер, сыргалар, тыва чавага, бижектер дээш оон-даа өске ажылдарын кижи магадап ханмас.
Чоокта чаа болуп эрткен регион чергелиг “Мөңгүн кержек” фестивалынга ус-шевер ювелирлиг кылыглар шаңналынга ийиги черни чаалап, жюри кежигүннерин кайгаткан.
Республикада хомус-биле ажылдап турар ус-шеверлерни деткип, өзүп орар салгалдарны улаштыр хомусту кылып өөрениринге чогумчалыг байдалдарны тургузары-биле культура болгаш туризм сайыды демдеглелди кылып, бо айтырыгларны шиитпирлээрин дыңнаткан.
Тыва үндезин культура төвүнүң улусчу уран чүүл болгаш ус-шеверлер биле ажылдап турар килдизиниң ажылдакчызы Айлана Арыш-ооловна хомустуң келир үезин шиитпирлеп, Олег Картыг-ооловичиге аңгы хууда мастерскаяны тургузар деп шиитпирни чүүлдүг кылдыр саналдап киирген.
Тыва езу-чаңчылдарны кадагалап арттырары-биле улуг ажылды кылып чоруур “Ак баштыгларның алдын үүжези” деп төлевилелдиң удуртукчузу Валентина Монгуш бо ужуражылгага өөрүп, Виктор Чигжитке бодунуң номун белекке берген. Валентина Бегзиевна ус-шеверниң улуг даай-авазы. Оларның авалары кады төрээннер. Олег Картыг-ооловичтиң кады-төрээннери база ус-шеверлер Өпей-оол Картыг-оолович, Айлаң Картыг-ооловна база ужуражылгада келгеннер.
– Бистиң төрел-аймаавыс черле шевер, салым-чаяанныг. Кырган-ачавыс кончуг ховар талантылыг дарган кижи чораан. Ооң адын безин Дарган дээр. Мээң чээннерим ам бо үеде кырган-ачазының оруун изеп, чоннуң чагыгларын шеверлеп кылгаш, улуг үнелелди чаалап ап чоруур –
деп, Валентина Бегзиевна чугаалаан.
Чоокта чаа Якутияга болуп эрткен хомус күүседикчилериниң улуг делегей чергелиг мөөрейинге Тыва Республиканың Улустуң хөөмейжизи Евгений Сарыглар Олег Картыг-ооловичтиң шеверлеп кылган хомузу-биле ойнап күүсеткеш, тиилекчи атты чаалап алган.
#Культураяамызы #Тываүндезинкультуратөвү #Барыын_хемчиккожуун #Ус_шевер #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
