Сүт-Хөл кожууннуң Суг-Аксы сумузундан Руслан Делгер-оол эрткен чылын «Социал керээ» программазынга киришкеш, хууда ажыл-херээн улгаттырып алыр аргалыг болган. Ус-шевер мооң мурнунда суй белектер кылып турган болза, ам бажың, өг эт-севин кылып эгелээн.
Күрүне деткимчези-биле узаныр-чазанырынга херек дериг-херекселдерни садып алгаш, хериминиң иштинде бичежек бажыңында цехте эптеп тургускан. Ол өг, бажың эт-севи, деспи, тос-карак дээш шуптузун кылыр.
– Мооң мурнунда суй белектер кылып турган болзумза, ам улуг эт-сеп кылып эгеленим бо. Өгленир деп турар келин кыстар удуур өрээлинде эт-севиниң өңү болгаш аяны-биле таарыштыр аптараларны чагыдып турар. Чоокта чаа «ак алдын» өңнүг аптара чаагаан, бо ажылды июль айга чедир доозар мен. Улус куда-дойга баш бурунгаар белеткенип эгелээр болгаш чазын-на чагыгларгны киирген.
Аптараның өртек-үнези ооң хемчээлинден хамааржыр, чеди муң рубльден өрү. Ширээ биле дөрт сандайны тускай кылдыр угулзалап чараштаар болза, өртээ он ийи муң рубль чеде бээр. Амгы үеде аът мөгейикчилери эзер дерип салыр, чүген, чулар азар эт база чагыдар апарган. Ол ышкаш мөге улустуң азы чүгүрүк аъттың шаңнал-макталдарын делгээр тускай үлгүүр-даа чагыдарлары бар.
Бо бүгүнү кылыр шупту херек станоктарны четчелеп алдым. Чиг этти колдуунда Ак-Довурак хоорайдан садып алыр-дыр мен. Чоорту лазер станок садып алыр күзел бар – деп, ус-шевер чугаалап турар.
Руслан Делгер-оол ажылдарының чуруктарын социал четкилерде салып турар. Ол Суг-Аксының уругларның уран чүүл школазында чурук башкызы. Делгер-оолдар дөрт ажы-төлдүг.
– «Вайбер» таварыштыр республиканың аңгы-аңгы булуңнарындан чагыглар хөйү-биле кээп турар. Чиңгине тыва аптара кылырын албан-биле өөренип алдым. Аптараны тиглээри амыр эвес, эгезинде будалып шаг болган мен.
Өг ишти: ийи орун, ийи аптара, үлгүүр, ширээ болгаш дөрт сандайны ай чыгыы кылыр мен – деп, Руслан Делгер-оол ажыл-херээн таныштырды.
Ус-шевер сайгарлыкчы делгелгелерге ажылдарын доктаамал киириштирип, садып-сайгарып турар.
#Сүт_хөлкожуун #Суг_аксы #Социалкерээ #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
