Кижи бүрүзү бодунуң чуртталгазында бар чедиишкиннерни чүгле кызыл дери-биле, кызымаккай ажыл-ижи-биле, быжыг тура-соруу-биле чедип ап чоруур. Бөгүн республиканың ажыл-агыйларының шупту адырларында ажылдап чоруур шудургу ажыл-ишчи кижилерниң байырлалы. Алдар-аттыг, хүндүткелдиг хоочуннардан эгелээш, чаа ажылдап эгелээн аныяктарга чедир.
Өвүр кожууннуң төвү Хандагайты сумузунуң чурттакчылары частың болгаш күш-ажылдың байырлалынга тураскааткан байырлыг чыскаалга киришкен.
Май бирниң чыскаалының киржикчилери Аныяктар шөлчүгежинге чыглып келген. Аңаа байырлалдың кол хемчеглери болган. Ниитизи-биле кожуун төвүнүң он беш күш-ажылчы коллективтери чыскаалга эрткен.
Күш-ажылдың хоочуннарынга болгаш ажыл-ишчилеринге, чыылганнарга Өвүр кожууннуң чагырга даргазының хүлээлгезин күүседип турар Айдыс Куулар база Төлээлекчилер хуралының даргазы Анай-Хаак Лопсан-Серен байыр чедирип, шупту эгелээшкиннерге чедиишкиннерни, күш-ажылы төлептиг үнелелди алырын, ажыл-ижи сеткил ханыышкынны бээрин күзээн.
"Өвүр кожууннуң хүндүлүг чурттакчызы" деп аттарны Көк Болатовна Базыр-оолга, Алдын Доржуевна база Кызыл-Уруг Чаакпановна Монгушка тывыскан.
Күш-ажылдың хоочуну Галина Тас майның байырлалы аңгы-аңгы мергежилдиң, назы-харның кижилерин каттыштырып, чаңгыс эп-сеткилин болгаш демин көргүзүп турарын демдеглээн.
Тываларның чараш мерген сөстери бар: “Кыры шимчээрге, хырын тодар” дээр. Холу шимчеп, кандыг-даа ажылды кылып чоруур кижи аас-кежиктиг, тодуг-догаа, бай-шыырак болурун угаадып турар.
