Виктория Вязникова – тыва спорттуң келир үеде сылдызы

Бай-Тайга кожууннун чагырга чериниң даргазы Аржан Хертек, ооң социал политика талазы-биле оралакчызы Роберт Аракчаа хостуг хүрешке болгаш кикбоксингиге республиканың каш дакпыр тиилекчизи Виктория Вязникова-биле ужурашкан.

Виктория – Тээлиде Тываның улусчу ус-шеверлер техникумунуң бирги курузунуң сургуулу. Спортчу кыс тос ажы-төлдүг найыралдыг өг-бүлениң эң улуу. Оларны өстүрүп, кижизидип чоруур ынак авазы – Кызыл-Даг ортумак школазының төөгү эртеминиң хоочун башкызы Роза Биче-оол. Өг-бүле Вязниковтарны боттарының үш ажы-төлүнге немей азырап алганнар.

– Келир үеде мени өөредип каан башкыларым ышкаш тренер болуксаар мен. Мени спорт-биле өңнүктештирген башкыларым: Чойган Шолбанович Адыг-оол, Самдар-оол Орлан-оолович Даржаа, Альберт Семис-оолович Адыг-оол оларга кезээде мөгейип чоруур мен – деп, чалыы спортчу ужуражылга үезинде чугаалаан.

Кожууннуң чагырга чериниң даргазы аалчызының салым-чаяанныын, быжыг туруштуун үнелеп, кандыг дуза чедирип болурун айтырып, чагыг-сүмезин берген.

Виктория Вязникова бурунгаар көрүштүг, өскелерден онзагай болганы-биле, тыва спорттуң келир үеде сылдызы апаар дээрзинге бүзүрел улуг.