Владислав Ховалыг: Четпестерни чайладырынга үе ам-даа бар

Тываның Баштыңы Владислав Ховалыг бо чылын ажыглалга кирер ужурлуг «Тайга» станциязының девискээринде дагдан хаактаашкынның комплекс тудуунда ажылдар кайы хире чоруп турарын хынап четкен. Ооң дугайында ол социал четкиде бодунуң арынынга бижээн.

– Дыка хөй үнелээшкиннерни социал четкилерге алдым. Ындыг турбуже дыштанган улус дагдан бадып тургаш, кемдээшкиннер ап турган таварылгалар дугайында база бижип турлар – деп, Чазак Даргазы айыткан.

Владислав Ховалыгның бодалы-биле алырга, харыысалгалыг кижилерниң талазындан чедир кылдынмаан ажылдар уржуун ындыг таварылгалар болгулаан.

– Бөгүн хаак станциязының бүгү девискээринге дыштанып келген кижилерге айыыл чок чорукту хандырарын инспекциядан негедим. Чедир кылдынмаан ажылдарны чайладыр үе бар-дыр – деп, ол негээн.

Владислав Ховалыг ол чорааш, «Тайга» турисчи комплексти тургузарының ийиги чадазында кылыр ажылдың хемчээлин чижеглей чугаашкан.
«Тайга» турисчи комплекстиң тудуу үш чадалыын сагындыраал. Дыштанып келгеннерге аалчылар бажыңынарының комплекизин төнчү чадада тудары көрдүнген.

ТР-ниң Чазак Даргазы Вячеслав Ховалыг эрткен чылын Бии-Хем кожуунга сургакчылап чорааш, “Тайга” станциязынга четкеш, туризмни сайзырадыры-биле ук станцияга дагдан бадар хаак трассазын чаартып, даг кырынче дыштаныкчыларның көдүрлүп үнер, өске дыштанылга черлеринден дудак чок электри дузазы-биле ажылдаар чүүлдү база кылыры артык эвес деп, чугаалаан турган.