Шуулганга төлевилелдиң хөй санныг хемчеглерин хевирлеп, ооң боттаныышкынынга үлүг-хуузун киирген кижи бүрүзү – партияның эге салбырларының төлээлери, эки турачылар, идепкейжилер, бүгү деңнелдиң депутаттары чыглып келген.
Тывага Улусчу программаны боттандырган беш чылдың дургузунда өөредилге, кадык камгалал, культура, спорт, орук ажыл-агый болгаш чаагайжыдылга адырында 1500 ажыг объект туттунган, чаартынган, долу септеттинген. «Бо саннарның артында боттуг ажыл-херектер бар болгаш, чоргаарланыр чүүлдеривис хөй» – деп, регионнуң Баштыңы демдеглээн.
Чижээ, 12 чаа школа туттунган, 55 школада үндезин септелгени кылган, 8 уруглар садын база аңгы-аңгы уруглар садтарынга 21 тудугну немей туткан, уругларга 1800 ажыг немелде олутту тургускан. Кадык камгалал адырында 34 чаа фельдшер-акушер пунктузун база 12 эмнелге амбулаториязын ажыткан, 21 эмнелге объектизин септээн. Орук инфратургузуунуң талазы-биле алырга, 283 километр оруктарны чаартып, 49 көвүрүгнү чаагайжыткан. Оон ыңай 141 хөй-ниити черин чаагайжыткан, чурттакчыларның дилээ-биле 17 көдээ культура төвүн, 19 амгы үениң ном саңын, 158 спортчу объектини туткан.
Республика чурттакчыларының кииргени 50 муң ажыг дилеглериниң 95 хуузу күүсеттингени – чуртта эң бедик көргүзүглерниң бирээзи. «Кижи бүрүзү хүн бүрүде ажыглап турарын көрүп турар. Ол дээрге бистиң ажылывыстың түңнели-дир. Тудугжу, эмчи, башкы, арат, сайгарлыкчы кижи бүрүзүнге –тургузукчу ажылдың шупту кижилеринге четтиргеним илереттим. Бистиң партиядан эш-өөрүмге, депутаттарга, эге болгаш тус черниң салбырларының секретарьларынга, идепкейжилерге четтирдим. Бодунуң күжүн, үезин, күш-ажылын берген кижи бүрүзүнге четтирдим» – деп, Владислав Ховалыг демдеглээн.
Улусчу программа чурттакчыларның дилеглерин боттуг төлевилелдерже болгаш национал инициативаларже шилчидеринге бодунуң дээштиин бадыткаан.
Чаа Улусчу программа 2.0 амгы үениң айтырыглары – тускай шериг операциязын, импортту солуурунуң айтырыглары, технологтуг болгаш экономиктиг бот-догуннаашкынны барымдаалап ажылдап кылдынган. Тускай шериг операциязынның киржикчилерин болгаш оларның өг-бүлелерин деткииринчеада-чуртчу кижизидилгеже, чаңчылчаан үнелиг чүүлдерни кадагалаарынче онза кичээнгейни угландырып турар. «Бо бүгү чаарттынган программаны болгаш чаа шиитпирлиг хемчеглерни негеп турар» – деп, Баштың демдеглээн.
Тывада үнүүшкүннүг «төгерик столдар» чорудуу-биле программаны ажылдап кылган. Чоокку беш чылдың дургузунда кожуун болгаш хоорай бүрүзүнге мурнады боттандырар ужурлуг боттуг болгаш чугула беш төлевилелдерни тодараттынган. Бо арга соңгукчуларның мурнунга партияның ажыл-чорудулгазының болгаш харыысалгазының үлегери апарган. Бо хүнге чедир «Улусчу программа 2.0» деп программаже Тываның чурттакчылардан 50 муң хире чагыглар кирген, естьрезультат.рф сайтыда санал-оналдар чыылдазы уламчылап турар.
Шуулган үезинде партияның Дээди Чөвүлелиниң Даргазы Борис Грызловтуң болгаш партияның Чиңгине Чөвүлелиниң секретары Андрей Турчактың өөрүп четтириишкин бижиктерин эң эки эге салбырларга болгаш идепкейжилерге тывыскан. Россияның Маадыры, ТР-ниң Аныяктар херектериниң сайыды база тускай шериг операциязын киржикчизи Буян Кууларга, тускай шериг операциязын киржикчизи Петр Шатохинге партийжи билеттерни байрылыг байдалга тывыскан.
«Түңнел бар!» шуулган партия болгаш хөй-ниити төлээлери-биле ажык чугааның шөлчүгежи апарган. Регионалдыг күүсекчи комитет даргазының бирги оралакчызы Шеңне Ховалыгның чугаазы-биле алырга, «Чаңгыс демниг Россия» партияда 2026 чылды тус чер салбырларының чылы кылдыр чарлаан.
Тываның регионалдыг салбыры партияның 25 чылдаан оюнга тураскаадып, «25 буянныг үүле-херек» деп акцияны эгелээр. Тус черниң салбырлары бо акция-биле социал ужур-уткалыг эгелээшкиннерни саналдап, республиканың чурттакчыларын деткииринче болгаш кол угланыышкыннарны хөгжүдеринче угланган төлевилелдерни боттандырар.