ТР-ниң Чазааның «Енисей Сибири» хөгжүлде корпорациязы-биле кады организастааны инвестиция конференциязы Тывага болуп эрткен. Тываның Баштыңы Владислав Ховалыг «Енисей Сибири регионнарының экономиктиг хөгжүлдезинге Тыва Республиканың ролю» деп кол кезээнге киришкен. «Енисей Сибири» корпорацияның чиңгине директору Сергей Ладыженко ажыл-агыйжы шуулганны башкарып эрттирген.
Владислав Ховалыг конференцияның киржикчилеринге байыр чедирбишаан, Сибирь регионнарының экономиктиг хөгжүлдезинге Тываның ролюн, республика баштыңының көрүжү-биле бистиң регионну таварып эртер транспорт оруунуң онзагай туружун демдеглээн. Россиядан Моолче база Кыдатче чурттар аразының транспорт оруктарның төлевилелдери Тываның стратегтиг хөгжүлдезиниң улуг кичээнгейинде деп ол айыткан.
– Чурттуң Президентизи Владимир Владимирович Путин-биле ужурашкаш-даа, Россия Чазааның хуралдарында-даа ол айтырыгны көдүрүп турган мен. Бөгүн Моол Арат Республиканың Кызылда чиңгине элчини Чимид Ганболд «Хандагайты» онза экономиктиг девискээрни тударынга Моол база онза сонуургалдыын бадыткады – деп, Владислав Ховалыг дыңнаткан.
«Стратегтиг шинчилелдер төвү» фондунуң чиңгине директорунуң оралакчызы Татьяна Караваева чаа геополитиктиг байдалдар үезинде улуг сонуургалды болдурган Сибирь федералдыг округту сайзырадыр стратегияның мурнады боттандырар төлевилелдеринге доктааган:
«Кызыгаар чоогунуң кады ажылдажылгазы – кол сорулга ол.
«Хандагайты» онза экономиктиг девискээр – Экономиктиг сайзырал яамызы-биле ол чагыгны чыл эгезинден манап тур бис, Россия Федерациязының экономиктиг сайзырал сайыдының оралакчызы Дмитрий Вахруков ол төлевилел деткимчени алырын чаңгыс эвес катап чугаалаан. Ам сорулга – документилерни шынарлыг белеткээш, ында санал-оналдарны сүмелээр.
Сибирьниң хөгжүлде стратегиязынче эдилгелер кирер чадавас, чүге дизе сөөлгү ийи чылда бистиң чуртувуста өскерилгелер болуп, ажыл-чорудулганың арга-хевирлери болгаш тускай сорулгалыг көргүзүглери өскерилген. Ынчангаш экономикада болгаш өске-даа адырларда мурнады боттандырар угланыышкыннарны база кылдынган чүүлдерни утпайн, чаа көрүүшкүн-биле ажылды уламчылаар бис. Чаа транспорт логистиказының коридорун калбартыры-биле бистиң көрүжүвүс бир дугаарында Чөөн чүкче угланган болур – деп, Татьяна Караваева чугаалаан.
Кызылда Моолдуң чиңгине элчини Чимид Ганболд экономика болгаш туризм, спорт болгаш культура дээш дыка хөй адырларга Тыва биле Моолдуң эп-найыралдыг чоннарының доктаамал болгаш сырый харлызаалыг кады ажылдажылгазын демдеглээн.
Бо чылын Тываның Хандагайты – Боршоо эрттирилге пунктузун таварты кожа чуртче эрткен Россияның чурттакчыларының саны 48 хуу өскен. Ийи таланың сонуургалдары дөмей: кызыгаар аймактарның губернаторлары Тывага албан езузу-биле кээп, кады ажылдажылга дугуржулгаларынга атты салып, арга-дуржулга солчулгалыг дыка хөй хемчеглерни эрттирген.
Кызылга эрткен инвестиция конференциязы Енисей Сибири регионнарның болгаш кожа Моолдуң хөгжүлдезиниң улуг хемчээлдиг планнарын таныштырарының эптиг шөлү апарып, бот-боттарынга хөгжүлде сонуургалдарынга үндезилеттинген чаа төлевилелдерни таныштырган. Пленарлыг хурал эгелээриниң мурнунда, инвестиция конференциязының киржикчилеринге Кызылда болгаш чоок-кавы кожууннарда үлетпүр объектилеринче үнүүшкүннерни организастаан.
Аалчылар Кызылда чаа микрорайоннар тудугларын, Сибирьниң улуг турисчи объектизи – Тубтен Шедруб Линг хүрээни сонуургап, «АгроТыва» агроүлетпүр парыгы биле үлетпүр парктың ажылы-биле танышкан. Шуулган киржикчилериниң бир бөлүү улуг инвестиция салыышкынының ачызында хөгжээн, боттуг инвесторларның сонуургалын болдурган Кызыл чоогунда бойдустуң турисчи объектилери – Чедер хөлде санаторий-курорт комплекизинге, Таңды кожуунда Хадың база Дус-Хөл хөлдерге четкен.
Конференцияның түңнелдерин үндүрүп тургаш, конференцияга Тываның инвестиция аргаларын таныштырарда, туризм адырынче улуг кичээнгейни салганы анаа эвес болганын Владислав Ховалыг бодунуң блогунда демдеглээн.
– Президент Владимир Путин бо чылдың сентябрьда республикага кээп чорааш, регионну хөгжүдеринге база кижилерниң амыдырал-чуртталгазының шынарын бедидеринге Тываның турисчи улуг курлавырын ажыглаарын демдеглээнин чугаалап, «бо чылын бистиң республика туризмни сайзырадыры-биле Россияның рейтингизинде бирги черни ээлээн. Турисчи негелделерег дүгжүп турар инфраструктураны тургузуп, аалчылар хүлээп алыр черлерниң санын көвүдедир херек – деп, Тываның Баштыңы кыйгырган.
ПоделитьсяСохранить в закладкахЕщё7 просмотров1 упоминаниеТуваМедиаГрупп24 ноя в 12:51Редактировать
