Тываның Баштыңы Владислав Ховалыг Москвага сургакчылап чорааш, РФ-тиң камгалал сайыдының оралакчызы – Россияның Чепсектиг Күштериниң Кол шериг-политиктиг эргелелиниң начальниги Виктор Горемыкин-биле ужурашкан.
Владислав Ховалыг чугаа үезинде, чурттуң камгалал сайыды Андрей Белоусовтуң адынче чоокта чаа дилег билдириишкинни кииргенин сагындырган. Ол документиде тускай шериг операциязының «Кыргыз» деп кыйгылыг дайынчызы Найырга Россияның Маадыры атты тыпсырын дилеп бижээн.
«Россия 1» телеканалының шериг корреспондентизи Александр Рогаткинниң «Вести Недели» дамчыдылгазынга дамчыткан репортажындан дайынчы даалга үезинде тыва оолдуң маадырлыг чоруун бүгү чурт билип алган. Ол болуушкуннар Запорожьениң ийиги улуг хоорайы Гуляйполеже халдаашкын үезинде болган.
«Кажан бистиң чаңгыс чер чурттуувус өөрлеринден аңгыланы бээрге, командылал черинден бир бажыңга быжыгланыр дужаалды рация таварыштыр алган. Ол аңаа боо-чепсектиг элээн каш украин дайынчыларны узуткааш, боду балыглаткан. Найыр балыгланган будун шарып алгаш, буступ хоозураан бажыңга бүзээлелди үш хонук тудуп келген. Балыгланганындан харыксырап шылаза-даа, черле дүжүп бербейн, 14 километрни эртип чорааш, чедип келген!» – деп, Владислав Ховалыг шериг албан черинге эрткен ужуражылга болган чугааның дугайында бодунуң телеграм каналынга дыңнаткан.
Тываның Баштыңының даалгазы езугаар, тускай шериг операциязының талазы-биле төлээ Тимур Куулар фронт шөлүнге бирги эмчи дузазын көргүзүп турар пунктуга чедип, Найырга ужурашкан.
Чаа-ла 20 харлыг дайынчы Бай-Тайга кожууннуң чурттакчызы, Х.А. Анчимаа-Тока аттыг Кызыл-Даг школазының доозукчузу.
Дайынчының шериг албан-хүлээлгезин эрттирип турары «Чөөн чүк» бөлүктүң командылал чери ону «Россияның Маадыры» деп атче идип үндүрген. Республиканың удуртулгазы ол саналды деткээн.
«Виктор Петрович бистиң дайынчыларывысты маадырлыг чоруу дээш шаңнап-мактаарының дугайында дилеглеривисти кезээде деткиир кижи, бо удаада бистиң дайынчы оглувус чогумчалыг үнелелди алырынга идегеп тур мен» – деп, Владислав Ховалыг бодунуң блогунда бижээн.