Тываның Баштыңы Владислав Ховалыг республиканың чурттакчыларынга Бүгү делегейниң уруглар камгалалының хүнү-биле байырын чедирген. Регионнуң удуртукчузу МАКС-та үндүрген Бүгү-делегейниң уруглар камгалалының хүнүнге тураскааткан байыр чедириишкининде, шагдан бээр хөй ажы-төлдүг өг-бүлелерлиг Тывага уруг-дарыг республиканың хөгжүлдезиниң болгаш чаагайжыдылгазының кол шимчедикчи күжү болуп турарын онзалап демдеглээн.
«Ада-иелерге, кырган-аваларга, башкыларга, кижизидикчилерге четтирдивис. Силерниң хүн бүрүде сагыш човаашкыныңар болгаш шыдамык чорууңар аныяк салгалга эң-не бүзүрелдиг даянгыыш-тыр» - деп, Владислав Ховалыг чугаалаан. Амгы үеде үш айның дыштанылга үези эгелеп турда, бо чайны уруг бүрүзүнге айыыл чок болгаш солун эрттирери – ниити сорулга болур деп база демдеглээн.
«Дыштаныр хонуктар бистиң ажы-төлүвүске хөй-ле кайгамчык чүүлдерни болгаш эки дыштанылганы сөңнээр болзун. Регионнуң өг-бүле бүрүзүнге амыр-тайбыңны, чылыгны, чечектелиишкинни күзедим!» – деп, Владислав Ховалыг чаагай чүүлдерни чугаалааш, бичии уруглар дыштанып турда, улуг улус школаларны, уруглар садтарын, спортчу шөлдерни тудуп, оларның бүзүрелдиг келир үезинге бүгү-ле байдалдарны тургузарын күзээн.
Тываның Баштыңы байырлалга тураскаадып, республиканың бүгү булуңнарындан Кызылга келген салым-чаяанныг уруглар-биле республика Чазааның бажыңынга ужурашкан. Оолдар, уругларның аразында өөредилгениң тергииннери, спортчу маргылдааларның база бүгү-российжи олимпиадаларының регионалдыг чадаларының тиилекчилери, чогаадыкчы мөөрейлерниң дээди шаңналдарының эдилекчилери, хөй-ниити шимчээшкиннериниң идепкейжилери бар.
Ужуражылга чылыг, найыралчы байдалга эрткен. Владислав Ховалыг Уруглар камгалалының хүнү-биле байырын чедиргеш, оларның чедиишкиннери тура-соруктуг, чүткүлдүг, күш-ажылдың көскү үлегер-чижээ дээрзин демдеглээн. Владислав Ховалыгның бодалы-биле алырга, салым-чаяанныг уруг дээрге, ниитилелге онза үнелиг, чурттуң экономиктиг, социал, культурлуг хөгжүлдезинге салдар чедирип турар күштүг угаан-саарыыл курлавыры-дыр. Кандыг-даа чедиишкин – кызымаккай күш-ажылдың, онзагай мөзү-бүдүштүң, тура-соруктуң, сонуургалдың түңнели дээрзин Владислав Ховалыг онзалап айыткан. Бо шынарлар чажындан эгелеп хевирлеттинер болза, олар келир үеде амыдыралдың чедиишкиннериниң дөзү апаар.
Владислав Ховалыг уругларның чедиишкиннери күш-ажылга, харыысалгалыг болурунга, ниитилелге ажыктыг үлүг-хуузун киирер күзелди оттуруп турар ада-иениң болгаш өг-бүлениң күштүг деткимчезинден тыптып келир деп бүзүрелин чугаалаан. Чедиишкинниг болурундан аңгыда, ук-төөгүзүн, өг-бүлезин, төрээн черин кажан-даа утпас ужурлуг дээрзин ол сагындырган.
«Тургузукчу күш-ажылдың болгаш өг-бүле ыдыктарының чылында мындыг чижектер онза чугула. Бодун ажыдарынга болгаш күзелдеринге бердинеринге үргүлчү дилээшкин шылгараңгай үре-түңнелдерни кезээде бээр. Силерге чоргаарланып тур бис!» – деп, республика Баштыңы демдеглээн.
Республика Баштыңы-биле ужуражылгадан аңгыда, байырлалдың аныяк маадырларынга Чазак бажыңынга экскурсияны организастаан.
Бүгү республикада янзы-бүрү назы-харлыг уругларга хөй санныг культурлуг, спортчу, оюн-тоглаалыг хемчеглер болуп эрткен. Кызылга кол болуушкуннар бүдүн хоорайның элээн каш шөлдеринге болган. Байырлалдың чаңчылчаан черлери – Тываның национал парыгы, Аныяктар сесерлии болгаш «Кызыл – Москва» шөлге элээн каш программалар чаштарны хөйү-биле хаара туткан.
Оон аңгыда «Дагдыныкчылар: чүгле чаныңда эвес, а кады!» деп төлевилелдиң киржикчилери боттарының хайгааралында алган уруглар-биле ужурашкан. Төлевилелде дагдыныкчылар болур республиканың күүсекчи эрге-чагырга органнары болгаш федералдыг структуралар удуртукчулары уругларның социализациязынга болгаш ниитилелде амыдырып-чурттаарынга адаптацияны эртеринге дузалажып турар. Чижээ, Чазак Даргазының оралакчызы Орлан Сарыглар болгаш ооң өөреникчизи К.И. Чуковский аттыг Тываның республиканың уруглар ном саңында тургустунган Уругларның культура-чырыдыышкын төвүнүң ажыдыышкынынга чораан. Өөредилге яамызының специалистери сески классчы оолга спортчу идик-хепти белекке берген. Оол спортчу болгаш, алызында шериг болур күзелдиг.