Амгы үеде Тываның Баштыңы Владислав Ховалыг Москва хоорайда ажылчын сургакчылаашкында-даа болза, республикада байдалды хайгаарап, Кызылга мигрантыларже халдаашкыннар дугайында бодунуң блогунда бижээн.
Тываның Баштыңы Чазактың иштики политика адырындан тода дыңнадыгны негеп, ол ышкаш бо чоокку үеде Чоннар болгаш шажыннар аразында харылзаалар талазы-биле чөвүлелдиң улуг хуралын чыырын дыңнаткан.
Тываның Иштики херектер яамызы Кызылда садыг-саарылга болгаш чемненилге объектилериниң девискээринге даштыкы хамаатыларже халдаан дээш, тус черниң үш чурттакчызын тудуп хоругдаанын дыңнаткан.
Истекчилер РФ-тиң Кеземче хоойлузунуң 213 чүүлүнүң 2 кезээнге көрдүнген “Хулиган чорук” дээш үш кеземче херээн оттурган, чеди чыл чедир хосталгазын казыттырып болур. Туттурган кижилерге хамаарыштыр хоругдал черинче алырының дугайында айтырыг шиитпирлеттинип турар.
Корум-чурум камгалакчыларының дыңнатканы-биле алырга, чөрүлдээниң чылдагааны – даштыкы чурттан келген кижиниң кылган кем-херек үүлгедиишкини болган. Амгы үеде ол хоругдаткан болгаш, кара-бажыңда чыдар, Владислав Ховалыгның айытканы дег, Россия Федерациязының хоойлулары-биле кеземчега онаажыры чигзиниг чок.
Тываның Баштыңы бо үеге чедир республикада ындыг чөрүлдээлер болбаанын демдеглээн.
– Бо үеге чедир язы-сөөк ылгажып, чөңгээленген болгаш удурланган шимчээшкиннер дугайында чүгле медээлерден дыңнаар, номчуур чораан бис. Тывада чоннар болгаш шажыннарның аразында билчилге кезээде бирги черле болуп, ону амыдыралда бадыткап чораан. Ол ындыг болуп артар-даа. Кандыг-даа даштыкы хамааты келген чурттуң хоойлу болгаш корум-чурумун сагыыры албан. А ону корум-чурум камгалаар органнарның ажылдакчылары шыңгыы хайгарап турар – деп, ол дыңнаткан.
Владислав Ховалыг камгалал күштери корум-чурумну болгаш хоойлу-дүрүмнүг чорукту хандырып турар, бо удаада республиканың чурттакчыларын бодамчылыг болурунче кыйгырган.
– Хүндүлүг чаңгыс чер чурттугларым, дыка хөй бистиң оолдарывыс Ада-чурт дээш эрес-дидим тулчуп, тускай шериг операциязының даалгаларын күүседип турар берге үеде, ниитилелди чайгылдырар оралдажыышкыннар барын көрдүвүс. Аныяктар социал четкилерде болгаш мессенджерлерде хөй кезиинде шола болгаш меге аттар артында чаштып алгаш хөй чүве бижээн кижилерниң күткүзүнге алзып, алыс шынны дилээр дээш хоойлуну арта базып, боттарының чуртталгазын үреп турар. Ол кижилер тодараттынып, чөптүг кеземче албан алырлар – деп, Тываның Баштыңы медеглээн.
Тываның Баштыңы Тываже чанып келгеш-ле, Националдар болгаш шажыннар аразының харылзааларының талазы-биле чөвүлелдиң делгереңгей хуралын дарый эрттирерин дыңнаткан.
