Ядыы-түреңги чорукту эвээжедиринге дээштиг арга – социал керээ

Россияның Президентиниң өг-бүлелерни деткээн эгелээшкиннер пакеди ядыы-түреңги чорук талазы-биле байдалды шеглээринге кол тепкииш болган.

2021 чылда өг-бүле, ие-чашты база уругларны деткииринче 5,8 млрд рубльди үндүрген, 2020 чылга деңнээрге 2,7 млрд хөй. 103,8 муң чаштарлыг 73 муң өг-бүле төлевирлерни алган.

Ядыы-түреңги чорукту эвээжедиринге дээштиг механизм – социал керээ болганын Тываның Баштыңы Владислав Ховалыг Тыва Республиканың Чазааның 2021 чылда ажыл-чорудулгазының үре-түңнелдериниң база 2022 чылда мурнады боттандырар угланыышкыннарның дугайында отчетудунуң талазы-биле ТР-ниң Дээди Хуралының сессия хуралында илеткелинде демдеглээн.

2021 чылда 369 керээ чардынган, 2020 чылдан 59 керээ хөй. Эвээш орулгалыг хамаатыларның ниити санындан 12 ажыг хуу кижини социал керээлерже хаара туткан.

Акша-хөреңгиниң 52 хире хуузу сайгарлыкчы ажыл-чорудулганы ажыдарынче үнген. 862 өг-бүле ол угланыышкын-биле дузаны алган. Эвээш орулгалыг 955 өг-бүле амыдыралдың берге байдалын ажып эртеринге, 640 өг-бүле хууда дузалал ажыл-агыйын хөгжүдеринге дузаны алган.

Төлевилелдиң беш муң ажыг киржикчизи керээ дузазы-биле амыдырап чурттаарының кудуку хемчээлинден хөй орулгалыын көргүскен.

Бо бүгүнүң төнчү сорулгазы – ядыы-түреңги чоруктуң деңнелин эвээжедиринде. Баш бурунгаар санаашкыннар-биле алырга, 2020 чылга деңнээрге ядыы-түреңги чоруктуң деңнели 2,4 пунктуга кызырлып, 31,7 хуу болган.

Эрге-чагырганың бүгү деңнелдерде органнарның кол айтырыы – ядыы-түреңги чорукту эвээжедири болуп артпышаан.