Яндекс школачыларга дипфейктерни таныдып өөредир төлевилелди эгелээн. «Чурагайлыг өөредилге» төлевилел езугаар уругларның сан-чурагайлыг билиглерин бедидер тускай материалдарны чыгган.
Яндекстиң кылымал угаан талазы-биле эксперттери дипфейктер болгаш оларны тодарадырының дугайында онлайн-кичээлдерни ажылдап кылган. Кичээл алды хардан өрү назылыг уругларга хамааржыр, ынчалза-даа сан-чурагайлыг айыыл чок чорукка сонуургалдыг улуг улуска, ада-иелерге болгаш башкыларга база ажыктыг.
Дипфейк дээрге херек кырында кажан-даа болбаан чүүлдү көргүзер нейрон четкилерин ажыглап тургаш кылган чуруктар, видео болгаш аудио бижидилгелер-дир. Оларның маадырлары хөй кезиинде билдингир кижилер болур. Оон аңгыда дипфейктерни колдуунда кем-херек үүлгедикчилери уруглар-биле харылзажырда дээш, будалдырып хөгледир кылдыр ажыглап турар. Чижээ, уругнуң чоок кижизиниң үнүн өттүнүп, оларның бүзүрелин чедип алыры белен.
Өөредилге материалын мультфильм хевиринге көргүскен, ында кол маадыр Кораллвиль деп чогааткан хоорайда бажыңныг балык. Школачылар аян-чорук үезинде дипфейктерни танып, оларның айыылдыын билип, интернеттен медээлерни шын шилиирин өөренип алыр.
Башкыларга методиктиг материалдары мультфильмде кошкан, ында кол фактыларның таныштырылгазын, интерактивтиг даалгаларны болгаш амыдыралдан чижектерни киирген. Билиглерин быжыглаары-биле школачыларны шылгалда дужаарынче чалап турар.
РФ-тиң Чурагайлыг хөгжүлде, харылзаа болгаш массалыг коммуникация яамызы база РФ-тиң Өөредилге яамызы-биле кады «Чурагайлыг экономика» автономнуг коммерцияга хамаарышпас организация «Чурагайлыг өөредилге» төлевилелди организастаан.
