Сарыг шажын хүрээлери – чүдүкчүлерниң лама башкылардан айыс алыр ыдыктыг черлери. Бурган өргээзинге Россияның аңгы-аңгы регионнарындан, даштыкы чурттардан чүдүкчүлер болгаш аалчылар хөйү-биле кээп турар.
Сарыг шажынның хүрээлери сүлде-сүзүктүг күжү-биле болгаш онзагай архитектуразы-биле куда-дой байырлалдарының чуруктарын тырттырар чери апарган.
«Тубтен Шедруб Линг» хүрээзиниң лама башкыларының чугаазы-биле алырга, чайын куда-дой үезинде чараш чуруктар тырттырып алыр дээш чурттуң эң улуг хүрээзинге улус хөйү-биле чыглып кээп турар. Оларның соонда хүрээниң девискээринге суксуннарның куруглаан савалары, чук стаканнар, таакпы артынчылары дээш оон-даа өске бок артып калыр.
Сарыг шажынның хүрээлери сүлде-сүзүктүг күжү-биле болгаш онзагай архитектуразы-биле куда-дой байырлалдарының чуруктарын тырттырар чери болу берген. Ооң-биле чергелештир чаа өг-бүле тудуп турар аныяктар болгаш оларның эш-өөрү хүрээлерниң дүрүмүн хажыдып, ыдыктыг девискээрге бок-сагын октап, хирлендирип, алгыржып, эзиртир суксуннар ижип, сүзүктүг черниң девискээринче аъттыг безин кире бээр таварылгалар бар апарган.
Тываның IV Камбы-Ламазы Гелек Нацык-Доржу Башкы хүрээлер чанынга чурум чок алдынары хоруглуг дээрзин айыткан.
– Хүрээлерниң девискээринге арага-дары ижип, таакпы тыртып, дааш-шимээн үндүрүп болбас. Чоокта чаа куда-дой эрттирип турар аныяктар аъттыг хүрээниң чадаларынче үнгеш, чурукка тырттырып турган. Маңаа хамаарыштыр чүдүкчүлер хомудалын илереткен. Бо бүгү хүрээниң дүрүмүнге шуут таарышпас. Моон соңгаар куда-дой эрттирип турар өгленишкен аныяктар, чурук база видео тырттырып турар улус лама башкыларны, чүдүкчүлерни, ыдыктыг черлерни хүндүлээри чугула – деп, Тываның Камбы-Ламазы чугаалаан.
Хөй-ниити черлеринге, ылаңгыя ыдыктыг черлерге, бодун алдынарының ниити чурум сагылгазын хажытпайн чоруур болза, кижи каяа-даа эпчок байдалга таварышпас болур.