Сүт-Хөл кожуунга Бурганныг-Тей девискээринге Кызыл-Тайганың ээлчеглиг дагылгазы болуп эрткенин чагырга чери дыңнаткан.
Дагылга езулалынга Тываның Камбы-Лама эргелелиниң хүндүлүг башкылары мөргулдерни номчуп, саңны салган. Гелек Насык-Доржу Башкы келген чудукчу чонга езулалдың алыс утказын билдингири-биле тайылбырлаан. Дагылганың киржикчилери ак сүдүн оран-тандызынче чажып, аъш-чеминиң дээжизин өргээн.
Езулал соонда спортчу хемчеглер – эр болгаш кыс чүдүкчү чон аразынга 50 болгаш 100 метрге назы-хар аайы-биле даг оору-биле чадаг чарыш, 18 харга чедир мөгелер аразынга тыва хүреш маргылдаазы болуп эрткен. Кожуун чагыргазы тиилекчилерни шаңнап-мактап, сертификаттарны тывыскан.
Ыдыктыг Кызыл-Тайганы дагыыр езулалды бедик деңнелге эрттирген кожуннуң Камбы-Ламазы база Тываның Камбы-Лама эргелелиниң лама башкыларынга чүдүкчүлер четтиргенин илереткен.
Таңды дагыыры – тыва чоннуң ыдыктыг езу-чаңчылдарының бирээзи.
