Ыраккы Кызыл-Хая сумузунда уран чүүл школазының септелгези

Мөңгүн-Тайга кожууннуң Кызыл-Хая сумузунда “Культура” национал төлевилелдиң күүселдези-биле уругларның уран чүүл школазының үндезин септелгезин чорудуп турар.

Ук оран-сава 1987 чылда туттунган. Бо хүнде эжиктер, соңгалар солуур, дээвиирин чавызадыр, батареяларын, шалазын солуур дээш кылыр ажыл-ла хөй.

Кызыл-Хаяның уругларның уран чүүл школазының директору Урса Монгуш септелге ажылдарының дугайында @tmgnews17 дыңнаткан.

– Үндезин септелге ажылдары июнь 15 үезинде эгелээн. Септелге кылыр садыглажыышкыны баштай Абакандан «Горизонт» КХН ойнап алгаш, ажылдарны күүседип чадай бергеш, керээни күш чок кылган.

Бо хүнде Бай-Тайга кожууннуң Кара-Хөл сумузундан хууда сайгарлыкчы Алаш-оол Хертек септелге ажылдарын кылып турар. Ооң бригадазында үш кижи бар. Тус черниң үш чурттакчызын база тудуг ажылдарынче хаара туткан.

Дөзевилелде өскерилгелер кирген. Мооң мурнунда чагыткан котел таарышпас, ажыглаар хуусаазы база улуг эвес болган. Ынчангаш өске котел-биле ону солуп турары ол. Оон аңгыда соңгаларны база чагыткан, каш хонуктан кээр – деп, Урса Монгуш чугаалаан.

Уран чүүл школазының орус чоннуң хөгжүм херексели – баян, чурулга, танцы-сам, ниити ыры, тыва улустуң хөгжүм херексели – дошпулуур салбырларында чүс уруг сонуургалы болгаш салым-чаяалгазының аайы-биле өөренип турар.

Эрткен өөредилге чылында школа 14 уругну доостурган. Оларның үжү Кызылда уран чүүл колледжиниң чурук салбырынче, бир оол национал хөгжүм херекселдеринге өөренип алыр дээш, шылгалда дужаарынга белеткенип турар.

Төлевилел езугаар үндезин септелгени чаа өөредилге чылынга чедир доозар ужурлуг деп, школаның директору дыңнаткан.