Ыраккы Мөңгүн-Тайганың башкыларынга эртем-методиктиг семинар

Тываның өөредилге яамызының болгаш Национал школа хөгжүдер институттуң тыва дыл хүнүнге уткуштур хемчеглери ыраккы Мөңгүн-Тайга кожуунга уламчылаанын институт дыңнаткан.

Мугур-Аксы суурнуң ийи школазының тыва болгаш орус дылдар башкыларынга эртем-методиктиг семинарны институттуң директору, филология эртемнериниң кандидады Е.М. Куулар эрттирген.

«Эртем-шинчилел ажылын чорударының негелделери» деп темалыг семинарга башкылар эртем-шинчилел ажылдарын чорударының методологиязының болгаш тургузуунуң талазы-биле билиглерин чаартып, немеп алыр аргалыг болган. Семинарның ажык-дузазы улуг болганын дыңнап, киржип келген башкылар демдеглээннер.