Мугур-Аксы биле Кызыл-Хая суурларда дизель энергиязы-биле ажылдаар чырык шугумнарының удазыннарын чаартыры планнаттынган. «Дизель» кызыгаарлаан харыысалгалыг ниитилел «Тыва Республикада энергетиканы хөгжүдери болгаш ону үре-түңнелдиг ажыглаары» күрүне программазы-биле ажылдарны чорудар. Септелге ажылдары хереглекчилерге чырык хандырылгазының шынарын экижидип, четкиже чаа абонентилерни кожарынга күчү-күштүң курлавырын тургузар.
«Дизельдиң» тускай мергежилдиглери март айда Мугур-Аксы биле Кызыл-Хая суурларда электри шугумнарын хынаан. Хыналданың түңнели-биле алырга, бо чылдар дургузунда чырык шугумнарның дыка хөй участоктары боттарының бүдүрүкчү курлавырын төндүр ажылдаан, ынчангаш аварийлиг өжүрүлделерниң болгаш токтуң өжүп-хывары ында деп бадыткаан. Септелге үезинде үрелген удазыннарны чаа, амгы үении-биле солуур.
Мугур-Аксы суурда Эрик, Найырал, Хунан-оол, Аэропортная кудумчуларда электри шугумнарының удазыннарын септеп эгелээр. Айыттынган кудумчуларга ажылдар эгелээри билек, кезек-кезектеп чырык өжерин оператор дыңнаткан.
Мөңгүн-Тайга кожуунну чырык-биле доктаамал хандырарының айтырыы Тываның Баштыңы Владислав Ховалыгның доктаамал хыналдазында. Ооң даалгазы езугаар апрель төнчүзүнде, Кызыл-Хая суурда 500 кВт күчүлүг дизельдиг генераторну тургускан. Оон ыңай, регионнуң удуртукчузу кыдыг-кызыгаар муниципалитеттиң чырык хандырылгазының чидиг айтырыын шиитпирлээр кылдыр Мөңгүн-Тайгаже кожа-хелбээ Барыын-Хемчик кожуундан чырык дамчыдар удазынны шөйер тудуг төлевилелин ажылдап кылыр даалганы ТР-ниң Одалга болгаш энергетика яамызынга берген. Амгы үеде албан чери аар өртектиг бо төлевилелге акшаландырыышкын дөзүн дилеп тывар ажылды чорудуп турар.
«Агаар-бойдустуң чылааны-биле «Дизель» кызыгаарлаан харыысалгалыг ниитилелдиң объектилеринде септелге ажылдары идепкейжээн. Тываның Баштыңының бистиң мурнувуста салган айтырыы – бүдүн чыл дургузунда чедери берге кожууннарда энергетика системаларының бүзүрелдиг болгаш үзүктел чок ажылын хандырарын чедип алыр. Регионнуң удурланышкак талалары – Мөңгүн-Тайга болгаш Тере-Хөл кожууннарга септелге ажылдарын чорудар. Чурттакчылыг черлерже херек тудуг материалдарын чедирген, ам бригадалар септелге ажылдарынче кирер» – деп, «Дизель» кызыгаарлаан харыысалгалыг ниитилелдиң удуртукчузу Ужар-оол Ондар дыңнаткан.
Чырык удазыннарын солуурундан аңгыда, агаар шугумнарының адаанда шөлдерни арыглап, калбартыр ажылдар база планнаттынган. Одалга сезону эгелээринге чедир септелге ажылдарын доозар.
